Suliartunngikkunik akiliisitaassapput

Sulisartoqarneq pillugu eqqartuussiviup Air Greenlandimi saqisut sulinerminnik unitsitsinerat inatsisinik unioqqutitsisuunerarlugu aalajangiiffigaa saqisullu sulileqqinnissaannik pisussaaffilerlugit.

- Sulileqqinngippata saqisut ataasiakkaat akiliinissamut pisussaaffilerneqassapput, Air Greenlandip pisortaa Michael Binzer oqarpoq.

- Tassa ullumikkut nalunaaqutaq pingasunut sulisartoqarneq pillugu eqqartuussivimmiippugut eqqartuussivillu aalajangiivoq saqisut sulinerminnik unitsitsinerat unioqqutitsinerusoq, tassa isumaqatigiissutinik unioqqutitsilluni sulinermik unitsitsineruvoq.

- Tassa saqisut ataasiakkaat sulisartoqarneq pillugu eqqartuussiviup aalajangiinera malillugu sulileqqinngikkunik akiligassinneqassapput, Michael Binzer oqarpoq.

Taanna aperineqarami soraarsitsisoqassanersoq, akivoq soraarsitsisoqarani saqisut ataasiakkaat akiligassinneqassasut, tassa sulisartoqarneq pillugu eqqartuussiviup sulisut ataasiakkaat eqqartuussiviup aalajangiinera malikkumanngippassuk akiligassissinnaavai.

- Saqisut sinniisaat nalunaarfigereerparput, saqisut suliartoqqinniariarpata saqisut peqatigiiffiat oqaloqatigerusullutigu. Kisianni saqisut isumaqatigiissutinik unioqqutitsisumik sulinertik uninngatiinnarniarpassuk oqaloqatigisinnaanngilavut. Aallaqqaataaniilli saqisut oqaloqatiginissaat siunnerfigaarput. Kingullermik ataasinngormat toqqaannartumik allaffigaavut pingasunngornermi ualikkut sisamanut oqaloqatigiissutigiumasaat pillugit oqaloqatigerusullugit. Tamanna tusaanngitsuusaarneqarpoq taarsiullugulu marlunngormat ullaarnganiit siumoortumik nalunaarutigineqanngitsumik sulinermik unitsitsineq aallartinneqarpoq. Taama pisoqartillugu ataasiinnarmik toqqagassaqarpugut tassalu eqqartuussivimmut suliassanngortitsilluta, Michael Binzer oqarpoq nangillunilu:

- Sullissatsinnut tassa ilaasunut ajuusaartorujussuuvugut, tassami ilaasussaraluavut saqisut peqatigiiffiannit sallunaveeqqutitut tigusatullusooq inissinneqarmata. Tassami illuatungeriilluta isumaqatigiissuteqarpugut maannalu illuatungitta isumaqatigiissut taanna malinniarnagu aalajangersimapput, Michael Binzer naggasiivoq.

Rosa Thorsenip apersuinera Elisa Isaksenimit kalaallisuunngortinneqarpoq.