Suliartoqqusiunnaarnerup atuutilersinneqarsinnaanissaa aarleqqutigigaat

Ilaquttanilu Sri Lankami ukioq manna januaarimi feeriarsinnaanissartik siornali pilersaarutigivaat. Nuliaata illooraa januaarip 20-ani katittussaammat kingusinnerpaamik januaarip 13-iani Danmarkiliarnissartik pilersaarutigivaat.

- Saqqami ukiup ilarujussuani najugaqartarpugut, billetillu qangali inniminnereerlutigit. Billetit sapinngisamik akikinnerpaajunissaat taamaalilluta angusinnaassavarput. Air Greenlandimi aamma kajumissaarutigisarpaa aallarnissaq sioqqutingaatsiarlugu inniminniisoqartarnissaa, Wilhelm Gemander oqarpoq.

Taanna takornarianik Qeqertarsuup Tunuani umiatsiamik angallassisarpoq. Nulia Sri Lankameersuuvoq, ataatsimillu paneqarlutik.

Nuliata illooraa januaarip 20-ani katittussaavoq, Sri Lankaliarnissartillu pillugu billetit siorna aggustimi inniminnersimallugit.

- Ilulissani juullisiorpugut, silap ajoriataarsinnaanerata kingunerisaanik Saqqami unittooqqasinnaanerput sillimaffiginiarlugu, Danmarkimullu januaarip 13-iani angalanissarput pilersaarutigaarput. Silap ajorsinnaanissaa sillimaffiginiarlugu ulluni marlunni Danmarkimiinnissarput aamma pilersaarutigaarput, Gemander oqarpoq.

Wilhelm Gemanderip qatanngutaa Tysklandimi najugalik Sri Lankaliassamaarportaaq, Dubai-imili naapissamaarpaat, Sri Lankamullu tassanngaanniit ingerlaqqissallutik.

Naapinngitsooriataarsinnaanissaat aamma aarleqqutigaat.

- Katittussat januaarip 20-ani katittussaapput. Ullumi tassani katinnissartik aalajangerpaat, katittuliarnissamut periarfissaqarniassagatta. Ajutuunnginniassagattalu sunut tamanut piareersarpugut, aallarsinnaassanngikkuttalu uggornassaqaaq, Wilhelm Gemander naggasiilluni oqarpoq.

Suliartoqqusiunnaarneq Air Greenlandimi sapaatip-akunnerata naanerani atuutilissappat ilaqutariit Gemander 12.000-it koruuninik annaasaqarnissartik ilimagaat.