Suliarinninnissamut neqeroorutit aalajangersimasut assigiinngitsut taamaatinnisssaat siunertaralugu siunissami pingaarnersiuisoqassaaq.

Naalakkersuisut aningaasanut inatsimmut siunnersuutaanni, tallimanngornermi saqqummiunneqartumi tamanna atuarneqarsinnaavoq.

Neqeroorutit sorlerpiaat taamaatinneqassanersut oqaaseqarfigisinnaanagu, Aningaasaqarnermut Nunanilu Avannarlerni suleqatigiinnermut Naalakkersuisup, Vittus Qujaukitsup (NQ) oqaatigaa.

- Peqqinnissaqarfiut aningaasartuutai massakkut qulaajaaffigileruttorpagut, aningaasartuutit kiffartuussinermilu pitsaassuseq ataqatigiinniartussaapput . Taamaattumik ukiap ingerlanerani nalilersuinerit sukumiinerusut tikikkutsigit peqqinnissaqarfiup tungaatigut allannguisoqassanersoq taamanikkussamut takujumaarparput, Vittus Qujaukitsoq oqarpoq.

Taamatullu saqqummiussisoqarnera nunatsinni peqqissaasunit nakorsanillu nuannaarutigineqanngilaq.

Sorliit taamaatinneqassanersut oqaatigiuminaappoq

- Napparsimasut eqqorneqassanngillat aamma uagut sulisut eqqorneqassanngilagut, Ken Jensen Peqqissaasut Kattuffianni siulittaasoq oqarpoq.

- Neqeroorutit sorliit sipaarniarfiginiarneqarnissaat siunnersuutigisinnaaviuk?

- Neqeroorutit tamarmik atorfissaqartippagut. Massakkut pingaaruteqarsoraara ataatsimiititaliamik pilersitsinissaq, susassaqartut tamarmik peqataaffigisinnaasaannik, Ken Jensen oqarpoq.

Peqqinnissaqarfimmi suleruluttoqarnera taassuma aamma oqaatigaa:

- Suleruluttoqarnera qaffannikooqaaq, sulisut suliassaat amerlinikuupput piffissakinnerullutillu. Tassami sulisut amerlasuut piffissami sivikitsuinnarmi atorfitsik atorfigisarpaat, tamannalu suleruluttoqarneranut peqqutaasut ilagaat.

Misissuinissamut atortut pitsaanerusut

Ken Jensenip oqariartuutai isumaqatigalugit, nunatsinni nakorsat peqatigiiffianni siulittaasup Hans Christian Florian Sørensenip oqaatigaa.

Peqqinnissaqarfimmilu suliarinninnissamut neqeroorutit sorliit sipaarniarfigineqassanersut oqaatigisinnaanngilaa.

- Nappparsimasut pitsaanerpaamik ikiornissaat suliarinninnissamullu pitsaanerpaamik neqeroorfiginissaat anguniartuarparput, nakorsat peqatigiiffianni siulittaasoq Hans Christian Florian Sørensen oqarpoq.

- Nunatta sineriaani aamma ulapeqaagut. Misissuinissamut allanullu atortut pitsanngorsaavigineqarnissaat kissaatigigaluarparput, kisiannili paasinarpoq aningaasaqarneq apeqqutaasorujussuusoq.