Suliaritinnissaminnut utaqqisut ikilisarniarneqalerput

Aningaasaliissutit iluanni 6,4 millionit koruunit Dronning Ingridip Napparsimavissuani suliaritinnissaminnik utaqqisunut atorneqassapput sinnerilu 3,3 millionit koruunit napparsimasut timikkut nappaatillit nunani allani katsorsarneqartarnerannut atorneqassallutik.

Tassa katillugit pilattaanerit 288-it aningaasassaqartinneqalerput. Taamaakkaluartoq suliaritinnissaminnik utaqqisut suli amerlasuupilussuupput, assersuutigalugu seeqquusaliinissanut utaqqisut 255-iupput, tusillassimasunik pilattaanissamut utaqqisut 300-juupput aammalu isikkut igalaasartaliinissanut utaqqisut 700-juullutik.

Aningaasaqarnermut naalakkersuisoq Maliina Abelsen naapertorlugu aningaasanik immikkoortitsineq Nunatta Karsiata 2011-mi naatsorsuutaasa 9,769 millionit koruuninik ajorseriarnerannik kinguneqassaaq, tassa qinnuteqaat aningaasalersorneqanngimmat.

Makkununnga aningaasat qinnutigineqarput:

- Dronning Ingridip Napparsimmavissuani 2011-ip sinnerani init pilattaaviit sisammerneqarnissat

- Siffiaasaliinerit 36-t

- Tusillassimasunik pilattaanerit 20-t

- Isikkut igalaasartaliinerit 100-t

- Sunngakkut ujarattaajaanerit 96-it

- Seeqquusaliinerit 36-t