Suliaritinniarlutik utaqqisut salliussapput
Peqqinnissaqarfimmut aningaasaliissutit aalajangersimasut amerlinngikkaluarlugit suliaritinniarlutik sivisuumik utaqqisut salliullugit sulissutigineqartussanngortut, Peqqissutsimut Naalakkersuisoq, Asii Chemnitz Narup oqarpoq.
Peqqinnissaqarfimmut 2005-imut katillugit 905 million koruunit aningaasaliissutigineqartut, 2006-imut akinut akissarsianullu nalimmassaatit ilanngullugit 918 million koruunit aningaasaliissutigineqartussanngorput. Ukiualunnguit qaangiuppata suliaritinniarlutik utaqqisut ikiliartornissaat neriuutigineqarpoq.
Peqqissutsimut pisortaqarfiup isumaqatiginniarnissamut tunngavissat Aningaasaqarnermut naalakkersuisumut ingerlatereersimavai taakkulu Inatsisartuni ilaasortanit aalajangiiffigineqassapput.
Peqqinnissaqarfinni paarlattaagallartartut ukiortaamit juulip naanerata tungaanut 11,3 million koruunit aningaasartuutigineqareersimapput, sulissussaaleqisarnerlu iliuuseqarfiginiarlugu ilinniartitaanikkut aamma siuarsaasoqarniartoq, Peqqissutsimut naalakkersuisoq oqarpoq.
