Suliaq Thule-mut tunngasoq naalakkersuinikkut mianernaqaaq
Suliaq Thule-mut tunngasoq naalakkersuinikkut mianernangaarmat Europami Inuit Pisinnaatitaaffiinik Illersuisussap Eqqartuussiviup suliariumanngikkaa, Inughuit illersuisuat isumaqarpoq. Eqqartuussiviup inerniliinera eqqartuussiviup qullersaanut maalaarutiginialerpaa.
Maj-imi 1953-imi Inughuit nunaqarfigisaminnit pinngitsaalisaallutik nuutsitaapput, europami Inuit Pisinnaatitaaffiissa isumaqatigiissutigineqarnerat Danmark-imi atuutilinnginnera qaammatinik pingasunik sioqqullugu; taamaammat europami Inuit Pisinnaatitaaffiinik Isumaqatigiissut aggustimi 1953 Danmark-imi aatsaat atuutilersimammat isummerfigisinnaannginnerarpaa.
Inughuarnilli illersuisup Christian Harlang-ip suliariumanninnginneq allamik peqquteqarnerarpaa.
-Qularutissaanngilaq Thulemut tunngatillugu suliassaq naalagaaffiit pissaaneqarniunnerannut attuumassuteqarluinnartoq, tamannarpiarlu eqqartuussiviup suliariumannikkumajunnaarnerannut pissutaalluinnarunartoq Christian Harlang naliliivoq.
Namminersornerullutillu Oqartussat 2004-mi Igalikumi isumaqatigiissummik atsiugaqarsimanerisa kingorna suliarinissaa eqqartuussiviup suli tunuarsimaarfiginerulissutigisimagaa. Suliassiissutigineqartorlu akuer-saarunikku annilaanngatigisungavaat Inughuit piniariartarfitoqqaminnut oqartussaaqqilersinnaanissaat.
Europami Inuit Pisinnaatitaaffiinik Illersuisussap eqqartuussiviup aatsaat taama eqqumiitsigisumik suliamik inerniliinera paasiuminaatsilluinnarpaa, eqqartuussissutimmi inernera allannerlugaaqaaq, amigaateqaqalunilu kukkuneqaqaaq, taamaammat suliaq eqqartuussiviup qullersaanut suliassanngortinniarpara, Inughuit illersuisuat Christian Harlang naggasiivoq.
Christian Harlang-ip oqaaserisaanut Inuit Pisinnaatitaaffiinik Illersuisussap Eqqartuussiviup allattoqarfianeersunik oqaaseqartitsisinnaasimanngilagut.
