Suliakkiissutinut piffissaalatsineq naalakkersuisup ajuusaarutigaa

Isumaginninnermut tunngasuni ilisimatuussutsikkut ilisimasaqarfimmillu pilersitsinissamut tunngatillugu suleqatigiissitap suliassai pillugit Ilaqutariinnermut Ataatsimiititaliap suli tigusaqarsimannginnera, Ilaqutariinnermut naalakkersuisup Naja Petersenip ajuusaarutigaa.
Allattoq Lotte Holm
marsip 10-at 2009 08:05

Ilaqutariinnermut Ataatsimiititaliap nassuiaateqarnissaa Inuit Ataqatigiit sinnerlugit Inatsisartunut ilaasortap Agathe Fontainip apeqquteqaatigaa, suliassalli nukinginnartut amerlavallaarnerat pissutigalugu, Ilaqutariinnermut Peqqissutsimullu Naalakkersuisoqarfik piffissaalatsitsisimavoq:

- Suliakkiut taamaattoq naammassineqarnissaanut Ilaqutariinnermut Peqqissutsimullu Naalakkersuisoqarfik piffissaalatsitsisimavoq, manna tikillugu nukinginnartumik suliassarpassuaqarnera pissutigalugu, Ilaqutariinnermut Naalakkersuisoq Naja Petersen allappoq, nangipporlu:

- Taamaalilluni Naalakkersuisoqarfiup pingaarnersiuinini allanngortittariaqalersimavaa. Suliakkiissut naammassineqariarpat Ilaqutariinnermut Ataatsimiititaliamut nassiunneqarnissaa isumagissavara, Naja Petersen Agathe Fontainimut akissuteqarluni allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq