Suliakkiissut politiit unitsiinnarpaat

Nanortallip kommuniani meeqqat inuusuttuaqqallu ikiorneqarnissaat pillugu, inatsisartut peqqussutaat unioqqutinneqarsimanersoq politiinit misissorneqarnera unitsinneqarpoq.

Nanortalimmi nakorsaanerup Rune Jacobsenip Nanortallip kommunianik politiinut unnerluutiginnittuuvoq.

Meeqqat sumiginnakkat pillugit suliassanik kommunip kinguartitsisarsimanerarlugu Rune Jacobsenip Nanortallip kommunia maajip qaammataani politiinut tunniuppaa.

Suliassat pineqartut arfineq-pingasuupput, ukiorlu ataatsip arfineq-marlullu akornanni uninngatinneqarsimanerarlugit poliinut tunniussisoqarluni.

Suliaq inatsisilerituunit nalilerneqareerluni naammassineqarsimalerpoq. Politiit qullersaqarfianeersoq Bjørn Bay ilisimatitsivoq pineqaatissiisoqarsinnaanissaannik tunngavissaqarsorinnginnamikku suliaq maanna unitsissimagitsik.

Inuiaqatigiinnili qullersaqarlunilu allersaqarnermillu tunngaveqartoq aamma paasinarpoq.

Politiit qullersaqarfianeersup Bjørn Bayip oqaatigaa inatsisartut peqqussutaat suliami pineqartumi atuutinngitsoq.

Meeqqat sumiginnakkat pillugit sullissinermi unioqqutitsisoqarsimappat, taava inatsisartut peqqussutaat pinnagu pinerluttulerinermi inatsit atuutsinneqartussaavoq.

- Pinerluttulerinermi inatsit Folketingimi aalajangerneqarnikuuvoq, kommuninilu atorfillit, kommunalbestyrelsinilu ilaasortat pineqaatissinneqarsinnaanngillat inatsisartut peqqussutaat tunngavigalugu, Bjørn Bay oqarpoq.

Nanortalimmi nakorsaanerup maanna periarfissaa tassaavoq suliaq naalagaaffiup unnerluussisuanut imaluunniit inatsisartut ombudsmandianut ingerlateqqissallugu.