Suli sila ajormat angalaneq kinguaattoorfiuvoq

Kitaata sineriaani ulluni kingullerni silallunnerata Air Greenlandip timmisartuussinera kinguaattoortippaa.

Ullumikkullu timmisartumik qulimiguulimmik Sikorky-mik, Sisimiut Kangerlussuullu akornanni timmisartuussinissaq 2 timenik aamma kinguaattoorpoq.

Sakkutooqarfimmut Kangilinnguanut Paamiunullu ullummikkut timmisartornissat aamma unitsiinnarneqarput, silap ajorpallaarnera pissutigalugu. Ullumikkut silap atorsaanerunera pissutigalugu timmisartoq qulimiguulik Sikorsky, Narsarsuarmut, Narsamut Qaqortumut Alluitsup Paanut Nanortalimmut uterlugulu angalatinneqassaaq, ilaasut ornitaannut apuunnissaat pillugu. Taannali aamma silamit kinguaattooqqasoq, Air Greenland nalunaarpoq.

Air Greenlandip timmisartuata King Air-ip Upernaviliarnissaa aamma taamaatiinnarneqarpoq, Air Greenlandillu paasissutsissiisarfianit Jesper Kunuk Egede ilisimatitsivoq, aqagu Upernaviliartussat, Upernavimmiillu kujammukartussat, Air Baffin-ip timmisartuanik anngunniarneqarumaartut. Air Baffin-ip timmisartua ilaasussanut allanut silarlummit akimmisinneqartunut aqagu aamma atorneqassaaq.

Kiisalu timmisartoq Dash 7 Ilulissani maanna uninngavoq atortussaminik utaqqilluni, timmisartup atortussaa sila atorsaaneruleriarpat piaarnerpaamik ilulissanut ingerlanneqassasoq, Air Greenland ilisimatitsivoq.