Suli Savissivimmut tikinngillat!
Inuit arfineq-pingasut Savissivimmi juullisiortussaagaluit suli Savissivimmut anngutinngillat, Qaanaamilu juullisiortariaqarsimapput.
Decemberip 22-ianili Savissivimmut apuunniarsimagaluarput, silali ajormat utiinnartariaqarsimallutik.
Savissiviliarniaraluit Pituffimmi ulluni pingasuni unnuereersullu napparsimasumik Qaanaaliaassisoqartussaanera iluatsillugu Qaanaaliaanneqarsinnaasimapput.
Kingorna Savissiviliarniat aamma tusarpaat, qulimiguulik teknikkikkut akornuteqalersimammat aatsaat januaarip tallimaani arfernaniluunniit ingerlaqqissinnaassallutik.
Taakku tamarmik qujanartumik Qaanaami ilaqutaqarallartillugit ilaquttaminni juullisiorsinnaasimapput.
Air Greenlandip paasissutissiisartua Tupaarnaq Rosing Olsen tamanna pillugu oqarpoq, qulimiguulik Qaanaap eqqaani nunaqarfiliaassisartoq aserortoorsimasoq. Aatsaallu januaarip sisamaani aserortoorutaasup atortussaanik Qaanaaliaassisoqartussaasoq. Taanna aperaarput, Savissiviliarniarlutik utaqqisut, akeqanngitsumik akunnittarfimmiissinnaanerat neqeroorutaasimanersoq.
- Air Greenlandip Namminersornerullutillu oqartussat kiffartuussinissamut isumaqatigiissutaani allassimavoq, taama pisoqartillugu inuit pineqartut aningaasartuutissatik namminneq isumagisassagaat, Air Greenlandip tusagassiisartua Tupaarnaq Rosing Olsen oqarpoq.
