Suli nunatsinni ilinniartitsisussaaleqineq annertuvoq
Ukiut tamaasa kommunit kattuffiat KANUKOKA ilinniartitaanermut pisortaqarfik KIIIP meeqqat atuarfiinik nakkutilliisussatut inissisimasuusoq peqatigalugu, nunatsinni ilinniartitsisussaqarniarneq pillugu naatsorsuusiortarpoq. Naatsorsuusiorneq oktobarip aallaqqaataani kommunini atuarfinniit ingerlateqqinneqartartoq ukioq manna aatsaat marsip 25-ianni saqqummersinneqartoq aallaavigalugu paasissutissiissaagut:
Nunatsinni ilinniartitsisussaaleqineq suli annertoqaaq, tamanna aamma aviisini allagarsiinertigut internettikkullu kommunini atuarfeqarfiit quppersagaanni takuneqarsinnaajuarpoq.
Ilinniartitsisutut atorfiit 1340 atorfissaqartinneqartut akornanni atorfiit 870 -it ilinniarsimasunik inuttalerneqarnikuupput; tassa procentinngorlugu atorfiit 65 procentit taamaallaat ilinniarsimasunik inuttalerneqarnikuullutik. Agguaqatigiissillugu ilinniarsimasut 70 procentii illoqarfinni atorfeqarput 43 procentiilu nunaqarfinni atorfeqarlutik.
Nunaqarfiit aqqanillit ilinniartitsisunik ilinniarsimasunik ilinniartitsisoqanngillat, taakkunannga nunaqarfiit ilaat ukiuni kingullerni arfinilinni ilinniartitsisoqarsimanatik.
Illoqarfiit anginerusut soorlu Nuuk Ilulissallu ilinniartitsisussaaleqiffiunnginnerpaapput; Nuummi ilinniartitsisut ilinniarsimasut 85 procentiullutik.
Ukioq atuarfiusoq 2004-2005 aammalu ukioq atuarfiusoq 2005-2006-imi naatsorsuusiornerit aallaavigalugit paasinarsivoq 2000-imi kommuninit atuarfinni atorfinitsitsisarneq tiguneqarmalli ilinniartitsisut atorfinitsinneqartut aatsaat taama ikileriartigisimasut, tassa siornarniit ilinniartitsisut 25-inik ikinnerusut atorfinitsinneqarsimammata, tassalu 28-t illoqarfinniit aallarsimammata pingasulli nunaqarfinnut nuussimallutik.
Tamanna KANUKOKAMI atuartitaanermi siunnersortip Karl Nielsen-ip tupaallaatigaa:
- Ilinniartitsisussaqarniarnerup ajornarsisimanera maluginiarsimanngilarput.
- Toqqissisimanngissutigaarput. Sungiusimalersimavarpummi kommunit ilinniartitsisunik atorfinitsitsisalernerisa kingorna ilinniartitsisut ilinniarsimasut amerliartorsimanerat. 2001-ip kingorna ilinniartitsisut ilinniarsimasut 110-nik amerleriarput; siorna 135-nngoraluartut massakkut 25-nik ikileriaateqarput, tamannalu toqqissisimanarpallaanngilaq, siunnersorti Karl Nielsen oqarpoq.
