Sinerissap qanittuani raajarniat tunisiumajunnaarnertik ingerlattuarsinnarpaat. KNAPK-p Royal Greenlandillu isumaqatiginninniarneri unittooqqasutut isikkoqaraluartut, taamaattoq KNAPK naatsorsueqqissaarluni maanna ulappuseruttorpoq. Royal Greenland ullaaq manna 1 millioni koruunit nalingisa missaannut qaffaasinnaalluni nalunaaruteqarsimavoq, KNAPK-millu akuersaarneqassanersoq naatsorsorneqaleruttorpoq.
Royal Greenland raajanik sinerissap qanittuani pisanik ukiumut 200 millioni koruunit nalinginut pisisarpoq, taakkulu KNAPK-mit qaffatsinniarneqarput 215 millioni koruuninngortillugit. Royal Greenland 7 millioni koruuninik qaffaassinnaalluni nalunaaruteqarnikuuvoq, taannalu naammaginagu raajarniat tunisiumajunnaarput.
KNAPK-mit raajat akii qaffatsinniarneqarput orsussamut aki ukioq manna aamma qaffatsinneqaqqimmat.