Suleqatiserinnipput

Nunatsinni innuttaasut EU-mi ilaasortaaniarnatik 1986-imi aalajangermatali atorfilittat immikkut ittumik tappavunga attaveqartarput. Aalisarneq pillugu isumaqatigiinniarnerni tamanna malunnarpoq.

Aalisakkat pingaarnerutippallaanngilavut, EU-mi aalisarneq pillugu ataatsimiititaliarsuarmi pisortaq, EU-milu isumaqatigiinniartitat siuttuat, Cesar Deban oqarpoq, nangillunilu:

- Kalaallit Nunaata isumaqatigiissuteqarfiginissaa pingaaruteqartorujussuuvoq. Aalisarneq kisiat eqqarsaatiginngilarput. qanimulli suleqatigiuarusupparput; aalisarneq suleqatigiissutigerusupparput, inuit qanilaarfigerusuppavut, naalakkersuinermik suleqatiseraarput, oqaluttuarisaanermi nunarsuarmilu nunat tamat suleqatigiikkiartulerneranni peqatigerusullutigu. Taamaammat Kalaallit Nunaannut attaveqartuarniarluta aningaasaliissuteqarniarlutalu

aalajangerpugut.

EU-mi ilaasortat aalisarsinnaatinniarlugit aalisarnermut isumaqatigiissusiarineqartartut siornatigut ilassuserlugit aalisagartassiisarpugut. Naatsorsuuserisunit ilassutigitittakkavut taakku nuannarineqarneq ajormata Kalaallit Nunaata EU-llu akornanni attaveqatigiinnerunissaq anguniarlugu isumaqatigiissutit erseqqinnerusumik suliariniarpavut. Aalisarneq pillugu isumaqatigiissutip saniatigut taamaalilluta EU-p tungaaniit ineriartortitseqataasinnaaniassagatta asuli aningaasaliiginnarnata.

- Aalisariutit Kalaallit Nunaanni nutaajupput aatsaallu aalisartoqaleruttorpoq. Aalisariutit ullutsinnut malinnaatinneqartuuppata allamiut aalisariutaat Kalaallit Nunaanni aalisartarunnaassagaluarput, Cesar Deban oqarpoq.

Aalisarneq pillugu isumaqatigiinninniartut sermersuup kaanngartarfiata eqqaanut Eqimut ippassaq angalaarput. isumaqatiginninniarnerillu pilersaarutit malillugit ullumi naammassissapput.