Assi: Google Street view

Suleqatigiissitsisut Kommuneqarfik Sermersuumi siulittaasuutitaqalertut

Michael Rosingip kommunabestyrelsimi suliat ingerlaatiinnarnissaat pingaartippaa, ataatsimiititaliamilu siulittaasuuffeqalerluni.

Kommuneqarfik Sermersuumi IA-p borgmesteriutitaqaannarnissani Suleqatigiissitsisunit tapersersorneqarluni qulakkeerpaa. Tamanna pivoq kommunalbestyrelsip ataatsimiinnerani borgmesteriusimasup Asii Chemnitz Narupip pisortatigoortumik tunuarfigisaani. 

AAMMA ATUARUK Fra borgmestersekretær til borgmesterkontor: Mød Sermersooqs nye politiske leder

Suleqatigiinnerli kommunip anguniangaanik allangorfiungaassanngitsoq, Suleqatigiissitsisut sinnerlugit Kommuneqarfik Sermersuumi ilaasortatuaq Michael Rosing erseqqissaavoq. Taassuma oqaatigaa IA-p Demokraatillu 2017-imi suleqatigiinnissamik isumaqatigiissutaat tutsuiginartuusoq. 

- Isumaqatigiissutitoqqamiittut ilarpassuinut isumaqataavugut, allanilli aamma ilanngussaqarluta, Michael Rosing oqarpoq.

Suleqatigiinnissamut isumaqatigiissummi siulittaasuuffeqalertoq

Suleqatigiissitsisut piumasaqaataat maanna tigusaasunngorlugit suli oqaasertalerneqanngillat, siulittaasuuffeqalereersimavorli.

- Politikikkut suliniutissanik neriorsuutisivugut, inissitassalli inisseriarpata nalunaarutigiumaarpagut, oqaatigisinnaavarali meeqqanut atuarfeqarnermullu ataatsimiitialiami siulittaasunngorama, Michael Rosing oqarpoq.

AAMMA ATUARUK Kommunalbestyrelsemi allannguineq: Borgmesterip tullersortai nutaat

Taanna meeqqanut atuarfeqarnermullu ataatsimiititaliami maannamut ilaasortatut issiasimavoq. Michael Rosing erseqqissaavoq ataatsimiititaliap taamatut ingerlanini ingerlatiinnassangaa.

- Kommunemi suliat ingerlaatiinnarnissaat soqutigisarinerpaavarput. Maannamut suliaasimasut pitsaasut ingerlateqqinnissaat nikittorsarnissaallu uagutsinnut pingaartorujussuuvoq, Michael Rosing oqarpoq.

Isumaginninnikkut ajornartorsiutit aaqqiivigineqarnissaat siuttuuffigerusukkaa 

Taamaakkaluartoq DR-ip piviusulersaarusiaata "Byen hvor børnene forsvinderip" takutinneqarnerata kingorna isumaginninnikkut ajornartorsiutit oqallisaaqqilersut aaqqiiviginissaanut allatut iliuuseqartariaqarsorivaa.

- Kommune sassartariaqalerpoq siuttunngorlunilu, ajornartorsiutini annernut ilaasimarpasimmat, suliassaq manna suliariumaneqanngitsoq, uagulli maanna taamaaliorpugut, Michael Rosing oqarpoq. 

Michael Rosing meeqqanut atuarfeqarnermullu ataatsimiititaliaq marlunngorpat ataatsimiilerpat pisortatigoortumik siulittaasunngortinneqassaaq. 
 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat