Suleqatigiissitaq upernaarli oqaluuserineqarsimavoq
Naalakkersuisut Aningaasanut Inatsisissatut Siunnersuutaanni atuarneqarsinnaavoq sinerissap qanittuani aalisarnerup nutarteriffigineqarnissaa Naalakkersuisut kissaatigigaat, aalisakkanik akitsuusersuisalernissaq isumaliutaannut aamma ilaapput.
Tamanna tunngavigalugu suleqatigiissitamik misissuisussamik siunnersuusiortussamillu Naalakkersuisut pilersitsisimapput, taannalu aalisarnermut attuumassutillit peqataaffigaat.
Suleqatigiissitarli nammineq januaarimi naalakkersuisunngunngikkallaramili oqaluuserineqarsimammat ilisimasaqarfigisimanagu Aalisarnermut Naalakkersuisoq Finn Karlsen ippassaq oqarpoq.
- Suleqatigiissitaq pilersinneqarsimasoq ukiup tullissaani sulilluni aallartinniarsimanissaa qularnanngilaq, suleqatigiissitallu suut akitsuusersorneqassanersut pillugit eqqarsaatersuutini ukiunut 2015-imut, 2016-imut aamma 2017-imut isummerfigisassatut saqqummiutissajunnarsivai, taamanikkussamullu suut akuerineqarsinnaassanersut suullu akuerineqarsinnaannginnersut taamanikkussamut nalilersussavarput, Finn Karlsen oqarpoq.
Aningaasaqarnermut Naalakkersuisoq Vittus Qujaukitsoq Radioaviisimut juunip 23-ani oqarpoq suleqatigiissitamik pilersitsisimallutik, suleqatigiissitap aalisarneq tamaat misissuiffigissagaa januaarimilu 2015-imi suliani naammassissagai Vittus Qujaukitsoq oqarpoq.
Aammali Inatsisartut 2015-imi Upernaakkut ataatsimiinneranni inatsisitigut allannguutissatut siunnersuummik saqqummiussaqarumaarluni erseqqissaavoq.
Aalisarnermut Naalakkersuisoq Finn Karlsen ilisimasaqannginnerarluni oqarsimammat apersorusussimagaluarparput, apersorneqarumananili piffissaq kingulleq ilisimatitsivoq, Aningaasaqarnermut Naalakkersuisumullu Vittus Qujaukitsumut innersuussilluni. Vittus Qujaukitsoq oqaloqatiginiaraluaratsigu manna tikillugu piffissaqarnani nalunaarpoq.
