Suleqatigiissitaq immikkut aaqqiiniartussaq pilersinneqarpoq
Task Forcemi suleqatigiissitaq naalakkersuisoqarfimmeersunit aamma aqutsisoqarfinneersunit arlalinneersunit ilaasortaqarluni katitigaavoq, peqqissaasunik atorfinitsitsisarnermi, aamma atorfimmiittuartitsinissamik, ajornartorsiutit qaangerneqarnissaannik periarfissarsiornissaq suliassaralugu.
- Suleqatigiit suliaata inernerissavaa suleriarnissamut pilersaarusiaq upernaap naajartulernerani suliaralugu aallartinneqartussaq, Naalakkersuisoqarfimmi pisortaq, Martha Lund Olsen, oqarpoq.
Peqqissutsimut naalakkersuisoq, Naja Petersen, siorna decembarip ulluisa arfernanni oqaraluarpoq, suleqatigissitaq ukioq manna ukiup aallartilaarnerani sulileriissasoq, Task Forcemili suleqatigiinnut ilaasortat maanna tassa aatsaat aggersarneqarput.
Peqqissaasut Nuummi Dronning Ingridip Napparsimmavissuani massakkorpiaq amigaatigineqartorujussuupput. Peqqissaasunullu pisortaq, Maybritt Andersen, ippassaq unnukkut Radioaviisimut oqarpoq, sulisussanik amigaateqarneq qaangerneqassappat peqqissaasutut aalajangersimasumik atorfillit aningaasarsiaat qaffanneqartariaqartut.
