Suleqatigiissitap peqqissartut illuat misissuiffigissavaa

Kalaallit Danmarkimi peqqissartut angerlarsimaffiata siunissami qanoq atorneqarnissaa suleqatigiissitamit misissorneqartussanngorpoq. Kalaallit Peqqissartut Illuanni najugaqartunut atugassarititat pitsaanerusinnaaqisut, peqqissariartortoq isumaqarpoq.

Peqqissariartortoq tassaavoq Naalakkersuisunut ilaasortaasimasoq Suka K. Frederiksen. Taanna peqqissariartullu allat Københavnimi Kalaallit Peqqissartut Illuanni atugassaritinneqartut pitsaanerusinnaasut isumaqarmata, Frederiksen atsiornernik siorna katersivoq.

Taakkua Kalaallit Peqqissartut Illuanni ilaatigut nerisassat naammagittaalliuutigaat.

- Nerisassaqarneq nukittorsarnissaq pingaaruteqartorujussuartut inissisimasarpoq. Kisianniuna nerisaqarneq uparuarternikuuarput siusinnerusukkut oqariartuutigalugu taanna iliuuseqarfigineqarsinnaasoq imaaliallaannaq, peqqissartumut pitsaanerusumik kinguneqarluni. Taannalu iliuuseqarfigineqarsinnaasimanngilaq maannakkut piffissaq sivitsortumi, Suka K. Frederiksen oqarpoq.

AAMMA ATUARUK Peqqissartut illuata ulikkaaqqanera kingunerluuteqartoq

Suleqatigiissitarlu sumiiffimmi nalilersuissasoq maanna aalajangerneqarpoq. Sulisut, peqqissartut peqqinnissaqarfimmilu sulisut suleqatigiissitamiittut peqqissutsimut naalakkersuisoq, Martha Abelsen oqaluttuarpoq.

- Nalunaarusiaq utaqqinngikkaluarlugu takusinnaagutsigu oqaloqatigiinnerni ima aaqqiinnagassanik peqartoq, taava soorunami qeratasuuliortoqassanngilaq. Sapinngisamik pitsaanerpaamik sullissinissaq anguniarlugu taakkua oqaloqatigiinnerit ingerlanneqartussaammata, Martha Abelsen oqarpoq.

Misissuisoqalernera Suka K. Frederiksenip nuannaarutigigaluarlugu isumalluarfigingaanngilaa.

- Tassami isumalluarniaraluarpunga, soorunalimi kinguneqartumik ingerlanneqarsinnaajumaassasoq. Kisiat neriuutiga annikitsutut inissisimasoq oqaatigisariaqarpara, Suka K. Frederiksen oqarpoq.

Suleqatigiissitap Kalaallit Peqqissartut Illuata siunissami ingerlanneqarnissaa ukiup affaata tulliuttup ingerlanerani nalilersussavaa.