Suleqatigiissitap nutaap kalaaliminernik atuineq annertusarniarpaa

Kalaaliminernik atuineq annertusarniarlugu qanoq iliortoqarsinnaava.
Aalisarnermut, Piniarnermut Nunalerinermullu Naalakkersuisoqarfik Ny Nordisk Mad suleqatigalugu INUILI-mi kalaallit nerisassiaataasa atugaanerat pillugu susassaqartunik sapaatip-akunnerata siuliani workshoppeqartitsivoq.

Kalaallit nerisassiaataat eqqarsaatigalugit peqataasut uummammiorisaat pingaartitaallu aallaavigalugit qanoq alloriaqqissinnaaneq oqallisigineqarpoq.

Narsaq-gruppemik taaneqartumik suleqatigiissitamik pilersitsisoqarpoq. Susassaqartunik allanik suleqatigiissitamut sapaatip-akunnerini aggersuni  ilannguttoqarnissaa sulissutigineqassaaq, suleqatigiissitaliallu siunertai anguniagassaalu inaarsarneqassallutik.

Suleqatigiissitami Edda Lyberth siuttuusussatut toqqarneqarpoq, kalaallit nerisassiaataannik soqutigisaqarluarnera atorluarumallugu.

Kalaallit nerisassiaataasa atugaanerisalu siuarsaavigineqarnissaannut soqutiginnilluartut suleqatigiissitaliamut ilaatinneqarnissaat pingaartinneqarpoq, anguniakkap pingaartinneqarluni sulissutigineqarniassammat.

Ny Nordisk Mad-imi aqutsisut Kalaallit Nunaanni ataatsimiinnerat iluatsillugu workshoppimik aaqqissuusseqatigineqarput, nunanilu avannarlerni misilittagarineqartunik isumassarsiorfigineqarsinnaasunik saqqummiisinneqarlutik.

Norgemi, Danmarkimi Ålandimilu nerisaqarnermi qanoq siuarsaasarnermi suleriuutsit misilittakkallu saqqummiisunit eqqartorneqarput workshoppimilu peqataasunit oqallisigineqarlutik. Ny Nordisk Mad-ip aqutsisuini suleqatigiissitaliaanilu Ålandimit aallartitarineqartut annertuumik workshoppimut tunniussisinnaasimapput, pingaartumik suleqatigiissitaliamik pilersitsisoqassagaluarpat qanoq aaqqiissuussisoqarsinnaanera eqqarsaatigalugu.