Suleqatigiissitaliaq ulapaassaqaaq
Suleqatigiissitaliaq Ilulissani qimmit paarilluarneqarlutik pineqarnissaannut suliniuteqartussaq suliassaqassaqaaq, ullaaq iterfiat siulleq tusarliunneqarmat Ilulissani qimmit marluk qiminneqarsimasut.
Suleqatigiissitaliaq qimmit atugaannut tunngasunik suliaqartussaq qiminillu ikilisaasussaq ippassaq unnukkut Ilulissani pilersinneqarpoq.
Suleqatigiissitalianngortoq ullumi siullermeerutaasumik ataatsimiittussaavoq, ullaarli qimmilerisut qimminik marlunnik qimitanik nassaarsimapput. Taakkualu massakkut uumasut nakorsaqarfianiipput.
Taamaasilluni suleqatigiissitaliaq qimmit peqatigiiffiinik uumasut nakorsaannillu inuttalersugaasoq piffissami aggersumi suliassaaloqassaqaaq.
Suleqatigiissitaliap ilaatigut qimmeqarfiit tulluunnersut misissugarissavai, ilaatigut masarsoqarfimmi qimmeqarfeqartoqartarmat, piffissap ilaani qimmit pitoqqasut panertumi aqupiffissaqarnatillu nallarfissaarullugit.
Aamma qimmeqarfiit imeqarfimmut qanilleqqeqqusaanngillat, tassa imeqarfiup killeqarfia tikilermassuk, taamaasilluni inuaqatigiinni qimmit amerlassuserisinnaasaat Ilulissani imminut killilerneqareerpoq.
Killilersuinissamut siunnersuutit ilagaat aatsaat ukiuni marlunni Ilulissani najugaqartoqareeraangami qimmitaartoqaqqusaalernissaq.
Hans Iversen, suleqatigiissitaliortoqarnissaanut suliniuteqartoq aamma oqarpoq nuna tamakkerlugu qimminut siunnersuisoqatigiiliortoqartariaqartoq, qimminut tunngasutigut siunnersuillunilu killilersueqatassussamik.
