Suleqatigiisitami meeqqat kaattut qitiutinneqassapput

Kalaallit Nunaanni meeqqat naammattumik nerisaqarneq ajortut qanoq iliuuseqarfigineqarnissaannik siunnersuusiortussamik, folketingimi suleqatigiissitaliortoqarnissamik kajumissaaruteqartoqarpoq.
februaarip 04-at 2009 10:30

Folketingimi Kalaalit Nunaat pillugu ataatsimiititaliaq suleqatigiissitaliamik pilersitsisoqarnissamik kajumissaaruteqartuuvoq.

Ataatsimiititaliaq nammineerluni suleqatigiissitaliamik pilersitsisinnaanngilaq, taamaattorli Kalaallit Nunaanni Naalakkersuisut danskillu naalakkersuisui suleqatigiissitaliamik pilersitsinissaannik kajumissaarneqarput.

Peqatigiiffik Foreningen Grønlandske Børn aammalu naalagaaffiit peqatigiit meeqqat pillugit suliniaqatigiiffia Danmarkimiittoq UNICEF Danmark suleqatigiissittami ilaanissaat Lars-Emil Johansen-imit siunersuutigineqarput.

Lars-Emil Johansen folketingimi Kalaallit Nunaat pillugu ataatsimiititaliami siulittaasuuvoq.

Misissuisitsinerit maannakkut pisariaqartinngilagut, meeqqalli kaattut qanoq iliuuseqarfiginissaannik innersuussutinik pisariaqartitsivugut, suleqatigiissitallu pilersinniarneqartup tamakkua innersuussutigisinnaavai, Lars-Emil Johansen oqarpoq.

Suleqatigiissitamik pilersitsinissamik isuma Folketingimi Kalaallit Nunaat pillugu ataatsimiititaliami tapersersorluarneqarpoq. Ataatsimiititaliami ilaasortat qaammatip ingerlanerani naapeqqissapput.