Suleqatigiinnissaq pisariaqartoq oqariartuutiginiarpaa
Tassani Sofia Rossen Atlantikup avannaani Suleqatigiinni ilaasortatut, Danmark sinnerlugu nalunaaruteqassaaq.
Sofia Rossenip nalunaarutaani puisinik arfernillu nungusaataanngitsumik piniarnermi ullutsinni siunissamilu unammilligassat, nunani issittuni qinikkat atuarsinnaassavaat.
- Ukiuni tuusintilippassuarni imaani uumasunik miluumasunik piniarneq ingerlassimavarput. Sulilu ingerlapparput. Periarfissarlu taanna pigiinnassagutsigu, nungusaataanngitsumik piniarnissamut tunngavissaqarluta ingerlatsisariaqarpugut, Sofia Rossen oqarpoq.
Taassuma ilisimatusarneq ilisimasallu, ilinniartitaaneq, ingerlatsineq nakkutilliinerlu kiisalu ilisimasanik ingerlatitseqqittarneq suleqatigiinnermi tunngaviusariaqarnerarpai. Ilanngullugu taakku pingaaruteqarnerarpai, tassami uumasunik illersuiniaqatigiit 'nukittuutut isigisariaqarmata'.
- Soorlu EU-mi inatsisartut puisit amiinik eqqusseqqusiunnaarnissamik aalajangiigaangata
nungusaataanngitsumik piniarneq pillugu suliat pitsaasut tamarmik maangaannartarput. Atuisut aamma EU-mi inatsisartuni ilaasortat uumasunik illersuiniaqatigiit puisinniartarnerup qanoq ingerlanneqartarneranik eqqarsaataat pisoqalisimasut ilumoortunullu akerliusut avaqqussinnaaneq ajoraat paasinarpoq, Sofia Rossen naggasiivoq.