Suleqatigiinnissaq kaammattuutigivaa
Utoqqalinersiutillit 3500-it atugaasa pitsanngorsarniarneranni 53 millioni koruunit amigaatigineqartut nassaariniarlugit suleqatigiinnissaq, Ilaqutariinnermut Ataatsimiititaliap siulittaasuata, Inuit ataqatigiinnneersup Olga P. Berthelsen-ip, Inatsisartunut ilaasortanut tamaanut kaammattuutigisimavaa.
Utoqqalinersiutinut inatsisissaq aasaq manna juulip aallaqqaataani atuutilissasoq politikerit neriorsuutigereerpaat.
- Inatsisartunut ilaasortaasugut siunnersuutivut aningaasartuutaasussat kinguartikkutsigit sipaarutaasinnaasutut takorloorpara, Olga P. Berthelsen siunnersuuteqarpoq, taamaanngippammi akileraarutit qaffannissaat aamma periarfissaammat:
- Aningaasat taakku suminngaanneernissaanik inatsisartut nassaarsinnaanngippata, naalakkersuisut isumaqarput akileraarutitigut qaffaasinnaanissaq allatut ajornartumik periarfissaasoq, Inatsisartut Ilaqutariinnermut Ataatsimiititaliaani siulittaasoq, Inuit Ataqatigiinneersoq Olga P. Berthelsen oqarpoq.