Suleqatigiinnissamik isumaqatigiissut siunnerfigisarpassualik

Kommunalbestyrelsinngortut pinngitsooratik immikkoortut arlalissut pinngitsooratik sammisariaqassavaat. Suliassat utaqqissunneqarsinnaanngitsut sukkanerpaamillu pimoorullugit suliarineqartariaqartut. Taakkununngalu ilaatigut ilaapput kommunimi inuussutissarsiorneq, ineqarneq, attaveqaatit sulinermilu atukkat.

Kommunerujussuaq pineqarmat Sermersuullu kitaani kangianilu inissisimammat, kommunimik ataqatigiissumik pilersitsiniarneq ajornakusoorsimavoq, taamaattumillu tamatuma tunumi ajornartorsiutaanera immikkut sammillugu qaqilerneqartariaqassalluni. Inuussutissarsiorneq, takornariaqarneq silaannakkut imaatigullu angallanneq pitsanngorsaavigineqartariaqarput, tamannalu aamma inissianik sanaartornermut tunngatillugu atuuppoq. Tasiilap pigisaani nunaqarfinni najugaqartut illoqarfinnut anginernut nussorsput. Nussorfigisaannili inissianik naleqquttunik annertuumik pisariaqartitsisoqarpoq, tamannalu kommunalbestyrelsinngortut immikkut isiginiartariaqassavaat.

Aammattaaq nunatsinni illoqarfiit pingaarnersaanni inissiat pitsaassusaat ajornartorsiutigineqartupilussuuvoq, Nuummilu ukiuni aggersuni inissianik hundrelikkuutaanik sanaartortoqarnissaa ilimanarpoq. Aamma Nuummi umiarsualivik annertuumik allannguiffigineqartussaavoq, tamatumanilu kommunip namminersorlutillu oqartussat peqatigiillutik umiarsualivik annertusaaffigisariaqarpaat, siunissami pisariaqartitanut naapertuuttunngorsarlugu.

Kommunittaaq atornerluineq aamma meeqqat inuusuttullu immikkut ikiortariallit immikkut sammisariaqassavai. Atornerluisunit qitornaasut akornanni ajornartorsiutit annertuupilussuit atornerluisunillu qitornaanerup kingunerisartagai ima annertutigaat kommunalbestyrelsinngortup tamanna pimoorulluinnarlugu aaqqiissuteqarfigisariaqassallugu.

Kommunimi nunatsinni illoqarfiit pingaarnersaata inissisimaffigisaani paaqqinnittarfeqarnikkut periarfissat oqallisaasupilussuullutillu allaaserineqartarsimapput, paaqqinnittarfinnillu amerlanerusunik sanaartornissamik pimoorussamik suliniuteqarnikkut taamaaliornikkullu paaqqinnittarfimmi inissanik qulakkeerisoqarsinnaappat tamanna siuariarnerussalluni annertuupilussuaq. Aamma nunani allani ilinniagaqartut ilinniarnermik kingorna nunatsinnut angerlarteqqinnissaannik suliniuteqarnermut tamanna iluaqutaalluassagaluarpoq. Meeqqammi paaqqinnittarfinni inissaqartinneqannginnerat tamatumani ajornartorsiutit annersarivaat.

Suliffissaqartitsiniarnikkut meeqqat atuarfiinullu tunngatillugu ajornartorsiutaasut aamma avaqqunneqarsinnaanngilaq. Kommunimi suliffissaaleqineq annertuallaaqaaq, susassaqarfimmilu tassani nutaanik suliniuteqarnissaq suleqatigiinnissamik isumaqatigiissummi nutaami nassaassaanissaa qularnanngilaq. Ilinniartitaanermut tunngatillugu pissutsit aamma pitsaavallaanngillat, inuusuttummi meeqqat atuarfianit soraarummeernermik kingorna ingerlaqqiffiusumik ilinniarnissaminnut periarfissaqanngitsut amerlavallaarput. Ilarpassui siusinaartumik pensionisiaqalissapput, tamannalu inuusuttunut ilaqutaannullu aammalu kommunip aningaasaqarneranut ajoqutaassaaq.