Suleqatigiinnerup ingerlarnga sukumiisumik misissorneqassaaq

- Suleqatigiinnerup maannamut ingerlarnga misissoqqissaarniarparput. Suut isumaqatigiissutigineqarnikuunersut, suullu akuersissutigineqarnikuunersut nakkutilliinerillu qanga pisarsimanersut suullu nakkutigineqarsimanersut misissorniarlutigit. Ombudsmandimi inatsisilerinermik pisortaq Michael Mikkelsen taama oqarpoq.

Umiarsuaaqqami Tûgdlimmi Nuullu Kangerluani Qooqquni immikkoortortaqarfimmi pissutsit "isornartorujussuusut" upernaaq paasineqarmat, Tûgdlik maajip aallaqqaataani matuneqarpoq.

Tûgdlimmik piginnittoq Tom Augo Lynge, Tûgdliup matuneqarnera eqqartuussissuserisuni aqqutigalugu Ombudsmandimut naammagittaalliuutigaa.
Eqqartuussissuserisoq Finn Meinel naapertorlugu Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfik Tûgdliup matuneqarnissaanik aalajangiinermi aalajangersakkat uniorlugit suliamik ingerlatsisimavoq, Ombudsmandillu tamanna ilalerpaa.

Tûgdliup matuneqarnissaanik aalajangiineq Naalakkersuisoqarfimmit Tûgdlimmik piginnittumut nalunaarutigineqalermat Namminersorlutik Oqartussat eqqartuussissuserisuat aqqutigalugu tamanna pisimavoq, Ombudsmandilu naapertorlugu tamanna pissusissamisuunngilaq.

Tûgdliulli matuneqarnissaa Namminersorlutik Oqartussat attappaat, aalajangersakkat malillugit tamatumuuna nalunaarutigineqarluni. Tamannali Tom Lyngemit eqqartuussissuserisuanillu naammagittaalliuutigineqarpoq, sulialli ingerlarnga sukumiinerusumik aatsaat misissuiffigineqareerpat aalajangiisoqarumaarpoq.

- Paasissutissat tamakkiisumik aatsaat pigilerutsigit suliap ingerlarnga paasisimasaqarfiginerulissavarput, Michael Mikkelsen oqarpoq.

Inatsisartut Ombudsmandiata paasissutissat Namminersorlutik Oqartussaneersut suli utaqqivai.

- Suliaq pillugu paasissutissarpassuaqarsimassaaq, tamakkulu katersornissaat pisariusimassagunarluni, Michael Mikkelsen oqarpoq.

Paasissutissat Inatsisartut Ombudsmandianut ukiortaartinnagu tunniunneqarumaartut, Ilaqutariinnermut Naalakkersuisoqarfiup ilisimatitsissutigaa.

Nuummi politiit Tûgdlik pillugu suliaq nangikkaat, ippassaq oqaluttuaraarput, ilisimannittunillu apersuinissaat qaammatinik arlalinnik sivisussuseqassangatinneqartoq.
Johan Westenip, Nuummi politiivinersup oqaatigaa.

Suliassat allat nukinginnartut pissutigalugit Tûgdlik pillugu suliaq unitsinneqarallarsimavoq. Siusinnerusukkut sulisuusimasunik meeqqanillu inissinneqarsimasunik ilisimannittunik ikinnerpaamik qulinik politiit suli apersugassaqartut, suliamik aqutsisut oqaatigaat.

Ilisimannittut ullumikkut Nunatsinni Danmarkimilu siammarsimammat suliassaq sivisuumik suliassaasoq Johan Westen KNR-imut oqarpoq.