Suleqatigiinnerunissamik pilersaartut - qanorpiarli taamaattoqassanersoq suli saqqummiunngikkaat

Nunanut allanut tunngasunut naalakkersuisup, Ane Lone Baggerip, nunanullu allanut tunngasunut ministerip, Jeppe Kofodip, nunatta Danmarkillu akornanni nunanut allanut tunngasunut sillimaniarnermullu politikkimi suleqatigiinnerusoqalernissaa nalunaarutigaat. Nunattali qanorpiaq sunniuteqarnerulernissaa suli saqqummiunneqanngilaq.
Suleqatigiinnerunissamillu siunnerfeqarneq oqaasiinnaassanngitsoq nunanut allanut tunngasunut politikkikkut oqartussat neriorsuutigaat. Assi © : Paalu Møller KNR
oktobarip 22-at 2019 16:21

Nunanut allanut tunngasunut naalakkersuisup Ane Lone Baggerip danskillu nunanut allanut tunngasunut ministeriata, Jeppe Kofodip, tusagassiortunik ullumi katersuutsitsigamik naalagaaffeqatigiit suleqatigiinnerulernissaannik nunattalu nunanut allanut tunngasunut politikkimi sunniuteqarnerulernissaa oqaatigeqqippaat.

- Suliamik uatsinnut pingaaruteqarsorisannik, naalagaaffeqatigiinni nunanut allanut tunngasunut, sillimaniarnermut illersornissamullu politikkimut suleqatigiinnermik nutarsaasussamik ullumi aallartitsivugut, Jeppe Kofod oqarpoq.

AAMMA ATUARUK Kalaallit Nunaat nunanut allanut politikkikkut piginnaaneqarnerusariaqarpoq

Nunatta sunniuteqarnerunissaa Mette Frederiksenip ministeriuninngornanili neriorsuutigaa. Ruslandip Kinallu Issittumik soqutiginninnerat Donald Trumpillu nunatsinnik piserusunnera ministeriunerup isumaanik allannguinngillat.

- Malittarisassat, isumaqatigiissutit ileqqullu nalunngisagut tatineqarput. Pissaanilissuit unammipput, taamaattoqarneranilu uagut nunatut minnertut ataqatigiinnissarput silarsuarmilu aaqqissuussaanermik uagut soqutigisatsinnik ataqqiffiusumik pilersitsisoqartikkumallugu akiuunnissarput pingaaruteqarpoq, Jeppe Kofod oqarpoq.

Suli tigussaasumik saqqummiussinngitsut

Nunarput Savalimmiullu sunniuteqarnerulissapput. Qanorpiarli taamaattoqassanersoq nunanut allanut tunngasunut politikkikkut akisussaasut marluk ullumi oqaatigerusunngilaat.

- Soorunalimi tigussaasumik maannakkut peqanngilagut, kisianni isumaqatigiissuteqarpugut sulissuteqassalluta, Ane Lone Bagger oqarpoq.

Suleqatigiinnerunissamillu siunnerfeqarneq oqaasiinnaassanngitsoq nunanut allanut tunngasunut politikkikkut oqartussat marluk neriorsuutigaat.

- Siunissaq eqqarsaatigalugu tigussaasunngorutsigit takkussissaagut. Kisianni una qularutigineqassanngilaq, qallunaat naalakkersuisuininngaanniit suleqateqarusunneq taavalu nukittorsaarusunneq Naalakkersuisunit takusinnaavarput, suleqatigiinnerup  tatigeqatigeqatigiittumik ataqqeqatigiittumillu ingerlanissaa pimoorukkaat aamma ingerlatissagaat, Ane Lone Bagger oqarpoq.