Suleqatigiiniarneq ilusilersorpaat
USA-p Kalaallit Nunaani sakkutooqarfeqarnerata saniatigut suleqatigiissutigiligaat allat Washingtonimi ungasinngitsunnguakkut ataatsimeeqateqarnerup kingorna piaartumik piviusunngortinnissaat siunertaralugu atorfilinnit qullernit maanna Nuummi ilusilersorneqarput. Namminersornerullutik Oqartussani pisortaaneq Kaj Kleist ima nassuiaavoq.
Kaj Kleist aamma oqarpoq ilisimatuussutsikkut, niuernikkullu Kalaallit Nunaata USA-llu suleqatigiinnerunissaat atorfillit qullersat maanna ilusilersoraat, assersuutigalugu sermersuup ilisimatuutut misissorneranut kalaallit peqataajumasut periarfissillugit, Alaskamilu aalisartut peqatigiiffiat maanna suletigineqalissaaq, assersuutigalugu Royal Greenlandip tunisassiaminik kimmut tunioraanerulernissaanik aqqutissiorluni.
Tamatumalu saniatigut nunap eriagisap, soorlu Tunup avannaarsuata paarilluarnerunissaa eqqarsaatigalugu amerikamiut nunamik paarilluagassamik nakkutiginninnermikkut misilittakkatik atorluagassanngortinniaraat. Amerikamiullu sakkutuumik ingeniørit Kalaallit Nunaanni atorluarnissaaat siunnersuutigisimavaat, neqeroorutigalugu ingeniørtroppimik Qaanaap mittaarfianut aqquserngup upernaat tamaasa innarlertartup iluarsaassinissaat siunnersuutigalugu qinnutigalugulu.
Pisortaaneq Kaj Kleist aamma oqarpoq kalaallit, danskit amerikamiullu atorfilittaat ukioru decemberimi fjernsynikkut ataatsimeeqatigiissasut, aappaagu majimi Københavnimi ataatsimeeqatigiinnivissaq ilaatigut piareersarlugu.
