Suleqatigiillutik kinguaassiutitigut atornerluisarneq akiorniaraat
Kinguaassiuutitigut atornerlugaasimasoq sumut saaffiginnissalluni nalornissutigiuaannarsimavaa, atornerluisarneq oqallisigineqarneq ajormat kanngunartutullu isigigamiuk, taamaatut arnaq 56-inik ukiulik meraalluni atornerlunneqarsimasoq oqarpoq.
-Saaffigisinnaasakka tamarmik, tassalu anaanaga, ilinniartitsisut inuusuttuaraqatinnut meeqqanut mersernartuaannarsimapput. Kanngunartutut isigigakku oqalliisigineqarneq ajormat, taama Rebekka Joelsen Lennert meeraalluni atornerlunneqarsimasoq oqarpoq.
Rebekka Joelsen Lennert meeqqat inuusuttullu atornerlunneqarsimasut sullineqartarnerat pitsanngortinniarlugu suliffeqarfiit akimorlugit suleqatigiinnissaq ulluni pingasuni pikkorissartitsissutigineqarnerani peqataavoq. Nuna tamakkerlugu inuit 150-it missaanik amerlatigisut peqataapput. Pikkorissartitsineq Saaffik Danmarkimilu meeqqat inuusuttullu kinguaassiutitigut killissartik qaangerlugu pissusilersortartut sullinneqartarfiat JanusCenter suleqatigalugu aaqqissorneqarpoq.
-Atornerlunneqarsimasunik sullisserusuttunik piumassuseqartoqarpoq, Ane Marie Hendriksen meeqqat inuusutullu kinnguaassiuutitigut atornerlunneqarsimasut saaffiginnittarfianni Saaffimmi Nuummiittumi ningiuusoq, pikkorissartitsinermilu aaqqissuisuusoq oqarpoq.
Atornerlunneqarsimasunik sullisserusuttut sinerissammiittut amerlapput, taakkuali sakkussanik aamma suleqatissanik amigaateqarput, tamannalu pissutigalugu sulinissaminnit tunuaannartarput, Saaffimmi ningiu Ane Marie Hendriksen oqarpoq.
Pikkorissartitsinerup kingorna meeqqat inuusuttullu kinguaassiuutitigut atornerlunneqarsimasut sulinneqartarnerat pitsaanerulissaaq. Pikkorissartitsinerup siunertaraa meeqqat inuusuttullu kinguaassiuutitigut atornerlunneqarsimasut amerlanerusut saaffiginnittarnissaat.
Pinerluttulerinermi inatsimmik unioqqutitsinerit politiit nalunaarutaat malillugu
meeqqanik 15-it inorlugit ukiulinnik kinguaassiutitigut kannguttaatsuliornerit politiinut nalunaarutigineqarsimasut 2007-imi 176-iupput 2008-imi 136-iullutik 2009-mi aamma 2010-imi 145-lutik siorna 109-it politiinut nalunaarutigineqarput.
Meeqqat inuusuttullu atornerlunneqarsimasut ikiorneqarnissaminnut sumut saaffiginnissallutik ilikkarsimavaat. Meeqqat inuusuttullu sinerissami qaammasarneqarnerigisigut paasissutissanik tuniorarneqartaramik sumut saaffiginnissallutik ukiuni ilisimaneruleriartorpaat.
Pikkorissartitsinermi illoqarfinni nunaqarfinnilu inunnik isumaginninnermik sulisut, politiit, napparsimaveqarfinneersut, tarnip pissusaanik immikkut ilisimasallit, ilinniartitsisut meeqqerivinnilu sulisut peqataapput. Rebekka Joelsen Lennert meeraalluni kinguaassiuutitigut atornerlunneqarsimasoq aatsaat 46-nik ukioqarluni atornerlunneqarsimanini oqaatigaa. Pikkorissartitsineq iluaqutaassoq taassuma oqaatigaa.
-Meeqqat inuusuttullu kinguaassiuutitigut atornerlunneqarsimasut eqqumaffigineqarnerulissasut. Pikkorissartitsinermi sakkussanik atortussanillu tuniorarneqarput, taama meeraalluni atornerlunneqarsimasoq Rebekka Joelsen Lennert oqarpoq.
Meeqqat inuusuttullu kinguaassiuutitigut atornerlunneqarsimasut sullinneqartarnerisa, suliffeqarfiit akimorlugit suleqatigiinnissamut pikkorissartitsineq ullumi naggataarneqarpoq.
Peqataasut angerlamut uterunik sulilffeqarfiit akimorlugit suleqatigiinnissamut isumaqatigiissusiornissaminnut periarfissinneqassapput.