Atlantikup Avannaani Suleqatigiit politikkikkut isummat apeqqutaatinnagit suleqatigiiffinngortiniarlugu ilaasortat pingasuusut atsioqatigeeqqammerput. Folketingip ataatsimiittarfianisulinermi taama kattunneq nukittoqutaassangatikkitsik, suleqatigiit savalimmiormiortaat, republikaneri Høgni Hoydal isumaqarpoq.
- Suleqatigiiffik pilersinneqarmalli 2001-mi tamanna misilikkaluarparput, tassa savalimmiormiut kalaallillu qinigaasa Danmarkimi partiinut pituttorsimanatik inissisimasinnaanissaat anguniarlugu.
- Soorunami sulinermi politikkikkut suut imaritinneqassanersut pillugit isumaqatiginniutigineqaqqaassapput, siunertarlu tamanna uatsinnut aalajangiisuulluinnassaaq, tassami Atlantikup Avannaani Suleqatigiit iluanni oqaluuserisassani namminersulernissamut tunngatillugu apeqqutit siullertut inissisimapput, Høgni Hoydal oqarpoq.
- Aamma sulinitsinni annerusumik isiginiartussaavagut, savalimmiormiut kalaallillu pisinnaatitaaffii, soorlu namminersulernissamut nunamik piginnittussaanerup oqartussaaffigilernissaa, il.il. Tamakkununngalu tunngasut nunat taakku marluk partiivisa akornanni isumaqatigiissutigineqartussaassapput.
Suleqatigiit politikikkut isummanut tamanut ammanniarnerat Folketingimi sunniiniarnissamut allaffeqarniikkullu nukittoqutaassangatinneqarpoq.