Suleqataammat akissarsitippaat

Aalborgimi politiit nukappiaraq 16-inik ukiulik, arnamik 85-inik ukiulimmik toqutsisoqarnerani paasiniaanerminnut atatillugu, suleqataalluarsimammat 1000 koruuninik ullumi akissarsitippaat.

Nukappiaqqap 16-inik ukiullip, Jens Enevold Nielsenip ADIDAS skuui paasiniaanermi iluaqutigineqarnerisigut, politiit toqutsisumik nassaarsinnaasimapput.

Tassa Aalborgimi politiit toqutsinermi paasiniaasartuisa kiisalu ADIDAS-ip fabrikkiutaani Tysklandimiittumi, inimi toqutsiviusimasumi tumit piliarineqarsimasut, ADIDAS-it skuut assigiinngitsut akornanni sorlernit pisuunersut paasineqarsinnaasimanngilaq.

Nalaatsornerinnakkullu Aalborgimi Vicepolitiinspektørip Frank Olsenip bussini ilaalluni nukappiaraq, Jens Enevold Nielsen, ADIDAS-inik skuulik takuaa. Nukappiaqqallu skuui pillugit paasissutissat allattupallappai, paasivaalu Bilkami pisiarineqarsimasut.

Kingorna paasineqarpoq ADIDAS-it qernertut 55-it Aalborgimi Bilkami tunineqarsimasut, pisisimasullu ilagaat nukappiaraq Kalaallit Nunaanneersoq. Nukappiaraq nunatsinneersoq tigusarineqarami killisiorneqarnermini nassuerpoq, nammineq arnamik 85-inik ukiulimmik toqutsisuulluni, kingornalu nukappiaraq Danmarkimut nuutsinneqarpoq.

- Taamani tupaqaanga Frank Olsenip politiitut ilisarnaatini nuisimmagu, skuukkalu eqqartulermagit. Asuleersorigaluarparami, kingornalu tusagassiuutitigut malinnaaninni paasillugu piviusumik paasiniaasoq, Jens Enevold Nielsen akissarsitinneqarnermini oqarpoq.