Sukorseq: Sorlammut aningaasaliissutit amerlanerussapput
- Sukorsip Sorlammut ilaasortaasuni annerpaalluni 3000-it missaannik ilaasortaqarpoq, aningaasaliissutillu ukioq mannamut ikilineqartut amerlassusaat aalajangiusimaneqarpata, tamanna Sukorsimut sunniuteqangaartussaasoq, siulittaasoq Tim Serritslev allappoq.
Sukorsip Sorlattulli kissaatigaa, aningasaliissutit siornatut 2014-imisut amerlassuseqarlutik, 1.034.000 koruuniussasut.
Aningaasanut inatsississatut siunnersuut taamaatsillugu akuerineqassappat, meeqqat inuusuttullu inuiaqatigiinnut suleqataalluarnerulernissaasa anguniarneqarnera killerneqassasoq, siulittaasup aarleequtigaa.
Aamma sunngiffimmi sukisaarsartarfinni ilaasortat sulisullu perorsaanermik pinaveersaartitsinermullu ilisimasaqalernissaannik suliniaqataasarnera unittuussasoq ernumagaa.
- Uggornassaqaarlu tamakkua annaaneqassappata, taamaattumik inatsisartut tamakkua eqqarsaatigilluaqqissaartariaqarpaat. Tassami meeqqanut inuusuttunullu suliniarneq unittoorluinnartussaammat, Sukorsip siulittaasua Tim Serritzlev allappoq.
