Sukkortut tb-mut qanittuararsuupput
Misissuinerup takutippaattaaq, Nunatsinni sukkortut tuberkuloseqalernissaminnut qaninnerusartut, taama oqarpoq, Steno Diabetes Centerimi, Seruminstitut-imilu phd-nngorniaq, Stine Byberg.
- Misissuinerit siulliit takutippaat, sukkornermik aamma tuberkulosemik nappaateqalersarneq Kalaallit Nunaanni atugaangaatsiartoq. Misissuinerillu kingulliit takutippaattaaq, sukkornermik nappaateqarnerup immaqa kingunerisaanik tuberkulosemik nappaateqalertoqarsinnaasoq, Stine Byberg oqarpoq.
Taassuma misissuinermini atorpai, 1999-miit 2001-mut aamma 2005-miit 2010-mut Nunatsinni tuberkulosemik misissuinerit inerneri. Ukiuni taakkunani inuit misissorneqartut 3.000-usut akornanni paasineqarpoq, inuit inersimasut 281-it sukkornermik nappaateqalersimasut, taakkunanngalu inersimasut aqqanillit tuberkulosemik nappaateqalersimasut paasineqarluni.
- Kisitsisit takuinnarlugit sukkornerup kinguneranik tuberkuloseqalersimasut amerlagisassaanngikkaluarput. Inunnulli 100.000-inut misissorneqarsimasunut sanillersuussissagutta, taava Kalaallit Nunaanni kisitsisit paasisagut qaffasipput, Stine Byberg oqarpoq.
Tuberkulose-mik nappaatillit ikittuinnaat paasineqaraluartut, taamaattoq paasisanut ilaavoq, kalaallit sukkornermik nappaatillit, sukkornermik nappaateqanngitsunut sanilliullugit tuberkuloseqalersinnaanerat aqqaneq marloriaammik qaninnerusoq.
- Maanna paasisagut eqqortuussappata, naak ilimagigaluarlutigu eqqortuusut, taava tuberkulosemik misissortinnermi, sukkortuunermik nappaat aamma misissorneqartassasoq kissaatigaarput, taamaalilluni sukkortunngornissamik nappaateqalersinnaanerup siusinaartumik paasineqartassaa pisassammat, Steno Diabetes Centerimi, Seruminstitut-imilu phd-nngorniaq, Stine Byberg taama oqarpoq.
Taanna oqarpoq, tuberkulosemik nappaatillit amerlanerit nassaarineqarpata
misissuinerit ingerlateqqinneqarnissaat kissaataasoq, taamaalilluni sukkornermik nappaateqarnerup kingunerisaanik tuberkulosemik nappaateqalersoqartarnersoq paasilluarumallugu.
Stine Bybergip aamma oqaatigaa, angutit sukkornermik nappaateqarlersartut arnanut sanilliullutik amerlanerusut.
