Sukkortut Nuummi peqatigiiffiliussapput

Nuummi sukkortut amerliartortut ilitsersorneqartariaqarlutillu tapersersoqatigiittariaqarput. Taamaattumik sukkortunut ilaqutaasunullu peqatigiiffiliortoqatariaqartoq, inatsisartunut ilasortaq Esmar Bergstrøm, aamma sukkortuusoq, isumaqarpoq.
Allattoq Najaaraq Egede
marsip 28-at 2009 17:38

Esmar Bergstrømip ilimagaa, Nuummiinnaq sukkortut 200-t missaanniissasut, isumaqarporlu taakkua sukkortut ulluinnarni periusissaminnik pikkorissartinneqartariaqartut, aammalu ikioqatigiittariaqarlutik.

- Sukkorneq sunaanersoq qanorlu ittuunersoq ilisimagaanni, Nunatsinni inuuneq ajunngilaq, inuuneq nalinginnaasumik ingerlaqqittarpoq. Mianersorfissaraarpulli, sutornerluta timerpullu qanoq atornerlugu, Esmar Bergstrøm oqarpoq.

Nerisassat sukkortunut tulluartut, sukkukinnerusut, orsukinnerusut naatitaanerusullu, akisuuallaartut, Esmar Bergstrøm isumaqarpoq.

- Nuummi ajorpallaanngilaq, akisullutilli. Kisianni Nunatta sinnerani akisunerupput taavalu pisiarineqarsinnaasut ikinnerullutik. Nerisassat sukkortunut naleqquttut akiisa taperneqartalernissaat anguniartariaqarparput, ingammik akissaatikinnerusut eqqarsaatigalugit, Esmar Bergstrøm oqarpoq.

Peqatigiiffiliornissaq Nuummi Atuarfik Samuel Kleinschmidtimi marlunngorpat apriilip arfineq aappaanni unnukkut arfineq marlunut pissaaq.

Sukkortut peqatigiiffiinik Qaqortumi Aasiannilu aallartitsisoqareerpoq.