Sukkortut naatitanik pissaqanngillat

Sukkornermik nappaateqartoq Upernaviup kommuneani Kangersuatsiami najugalik, Johan Christiansen naatitanik nerisaqaqqusaangaluarluni pisinnaanngilaq isorliunerusumi sikusartumiinnini nunaqarfimmiinninilu pissutigalugit. Johan Christiansen-ip naatitat nammineerluni pissarsiariniaraluarsimavai iluatsinngitsumik. Johan Christiansenip atukkani ima oqaluttuarai:

-Sukkornermik nappaateqarnera pissutigalugu siunnersorneqarpunga naatitanik annertunerpaamik nerisaqassasunga. Sikusartumiillunili tamanna ajornarmat nammineerlunga naatitanik tisitsisarnissara misissorpara paasillugulu Sisimiuniit Kangersuatsiamut naatitanik nassiussineq akisoorujussuusoq, taava taamalioniarnerigaluara unitsiinnartariaqarsimavara.

Johan Christiansen oqarpoq siunnersorneqarluni ulluni 14-ini naatitanik minnerpaamik 10 kiilunik nerisassasoq. Sisimiuniit, tassa sikusartup killiganiit naatitanik nutaanik ullut 14-ikkaarlugit nassiussineq katillugit 1500 kronet sinnerlugit akeqartoq naatsorsimavaa, naatitanik pisineq minillugu.

Sisimiuniit Kangersuatsiamut naatitanik 10 kiilunik timmisartukkut nassiussineq kiilumut 345 kroneqarput, tamatuma saniatigut isorliunerusunut nassiussineq immikkut akileraaruserneqartarpoq, Sisimiuniit Kangersuatsiamut nassiussineq 315 kroneqarluni. Tamatuma saniatigut naatitat Upernavimmiit Kangersuatsiamut ingerlateqqinnerat aamma immikkut akeqarpoq.

Taamaalilluni naatitanik nutaanik qaammammut tikisitsisarnissani 2500 kronet missaanni akeqassasoq oqaatigaa.

- Kisianni oqilisaanneqanngikkuma utoqqalinersiaqarlungalu tamanna soorunami akissaqarfiginngilara.

Johan Kristiansen maanna kalaaliminertuinnarami qasunerulersimavoq oqiliartulersimagaluarneralu killormut saassimalluni. Upernaviup kommunea Peqqinnissamullu Pisortaqarfik ajornartorsiunni pillugu saaffigisimagaluarpai kinguneqanngitsumik.

Nerisaqarneq pillugu Siunnersuisoqatigiit siulittaasuat nakorsaq Gert Mulvad, Johan Christiansenip nappaataanut tunngasunik siunnersuuteqarpoq:

- Sukkornermik nappaateqaraanni timip aalatilluartarnissaa naatitanillu nerisaqarluarnissaq pisariaqarpoq. Naatitanik nutaanik pisinnaanngikkaanni naatitat qillertuusaniittut qerisulluunniit nerineqarsinnaapput. Naatitanik massakkut qerititsisarneq pitsaaqimmat naatitat kimii allanngorpiarneq ajorput. Ullormuttaaq pingasoriarluni nerisarnissaq pisariaqarluinnarpoq, nerinerit, soorlu nagguteeqqanik aalisakkanik panertunik naatitanilluunnit qillertuusaniittunik annikitsunik akunnilerneqartassapput, Gert Mulvad siunersuivoq.

Naatitat qerisut qillertuusaniittulluunniit inoqarfinni tamani pineqarsinnaaleqqullugit pisiniarfiit kommuneqarfiillu suleqatigiinnissaat, Nerisaqarneq Pillugu Siunnersuisoqatigiinnit Naalakkersuisunut siorna inassutigineqarpoq. –Nerisassat peqqinnartut, naatsiiat panertutut sodavandisullu inoqarfinni tamani ajornarunnaartariaqarput, Gert Mulvad tikkuaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat