Sukkornermik nappaatilinnut 10 millioni koruunit

Sukkornermik nappaateqarneq inummut navianarluinnarsinnaasoq iliuuseqarfigineqalerpoq.

Nunatsinni sukkortunut atugassat 10 millioni koruunit Novo Nordisk A/S-ip neriorsuutigai. Aningaasat 10 millioni koruunit sukkorneq akiorniarlugu suliniarnissamut Peqqissutsimut Pisortaqarfik, Dronning Ingridip Napparsimmavissua sinerissamilu peqqissaaviit suleqatigalugit ukiut pingasut ingerlanerini atugassan¬ngor¬tinneqassapput.

Danmarkimi sukkornermik nappaatinut ilisimasaqarfik, Steno Diabetes Center, nakorsaanikkut peqqissaanermillu paasisimasalittut siunnersortaalluni tamatumani suleqataassaaq.

Sukkorneq Type 2 Diabetes nappaataavoq inooriaatsimik peqquteqartoq nunatsinni atugaajartuinnartoq. Sukkorneq paasineqanngitsoq katSorsarneqanngitsorlu sukkortup tappingerneranik, avatit arlaata peerneqartariaqalerneranik, sianiutimigut ajoquteqalerneranik, tartuminik suliunnaartoorneranik, uummatikkut taqqatigullu nappaateqalerneranik ilaatigut kinguneqarsinnaavoq.

Dronning Ingridip Napparsimmaviani nakorsaaneq, Birgitte Asmin Schurizek, oqarpoq, Nuummi sukkortunut nakorsiartarfimmik aallaqqaammut aallartitsissallutik, kingornalu Telemedicin atorlugu sinerissap sinneranut siunnersuisalissallutik.