Sukkorneq KOL-ilu akiorniarlugit suliniuteqartut
Inooriaatsip malitsigisaanik nappaatigilerneqarsinnaasut soorlu sukkorneq timip aalatinneratigut pinaveersaartinneqarsinnaapput. Nunarsuaq tamakkerlugu sukkortunut ullorititaq aamma nunarsuaq tamakkerlugu KOL-imut ulloritinneqartoq malunnartinniarlugu Inuunerissaasut nunatsinni illoqarfinni nunaqarfinnilu 16-ini pisuttuartitsinernik aaqqissuussipput. Aaqqissuussinerit ’Pisutta 2012’ nal.13.00 sumiiffinni assigiinngitsuni aallartissapput.
Aaqqissuussinerup 'Pisutta 2012’p siunertaasa ilagaat inuit timip atornerunissaanut eqqaasinneqarnissaat:
- Timi aalatillugu suliaqarnerit tamarmik inooriaatsip malitsigisaanik nappaatigilerneqarsinnaasut pinaveersaartinnissaanut iluaqutaasumik sunniuteqartarput aamma inooriaatsip malitsigisaanik nappaateqalereersimasunut. Timi aalatillugu sammisaqarnerit tamarmik soorlu eqqiaanerit, pisuttuarnerit aamma majuartarfikkoornerit iluaqutaapput. Kiakkiullugu tillernerullu qaffatsinneratigut pinaveersaartitsinerup sunniuteqarneri aamma qaffattinneqartarput, Inuunerissaasut ilisimatitsipput.
Illoqarfiit nunaqarfiillu Pisutta 2012-imi peqataatitaqartussat taassaapput Uummannaq, Qeqertarsuaq, Ilulissat, Aasiaat, Qasigiannguit, Maniitsoq, Napasoq, Kangaamiut, Atammik, Nuuk, Arsuk, Narsarsuaq, Narsaq, Qaqortoq, Eqalugaarsuit aamma Alluitsup Paa.
Pisuttuaqataanissamut soqutiginnikkuit illoqarfigisanni nunaqarfinniluunniit allagartaliisoqarsimanersoq alaatsinaaffigiinnassavat. Piumaguit aamma nittartakkakkut ’Pisutta 2012’ pillugu paasisassarsiorsinnaavutit www.amisut.gl –ikkut imaluunniit www.facebook.com/amisut alakkarlugu.
