Sukkorneq kingornuttagaasinnaavoq

Sukkorneq orsulinnik nerisarnermik imaluunniit timersunngippallaarnermit patsiseqartuaannanngilaq. Sukkornermik type 2-mik nappaateqalerneq kingornuttagaasinnaavoq. Nutaamik misissuinikkut timikkut kingornussisarnermi ajoqutit sukkornermut patsisaasartut aqutsisuni paasineqarsimapput. Taamaalilluni type 2-mik sukkornermi peqqinnanngitsunik nerisarnerup patsisaatinneqartarnera uppernarunnaarpoq.

- Danmarkimi sukkortut peqatigiiffiannut ilaasortarpassuit akornanni, aammami inuit akornanni, isumaqartoqartarpoq, nappaat nammineq pisuussutigalugu nappaatigineqalersartoq. Ukiunili arlalissuarni timikkut kingornuttagaasinnaanera pasitsaassimavarput. Maannali tuluit misissuinermikkut paasivaat nappaat timikkut kingornussisarnermi aqutsisunit patsiseqartoq. Taamalu immaqa oqarumasoqassalluni timikkut kingornuttagaammat nammineerluni qanoq iliuuseqartariaqanngitsoq. Taamaattorli timikkut kingornuttakkamik nappaateqaraanni inooriaatsimik allanngortitsineq pisariaqarsinnaavoq. Kisianni qangaaniilli nappaatip nammineq pisuussutigalugu nappaatigineqalersimaneranik eqqarsartarneq allanngortinneqarpoq, taama oqarpoq Danmarkimi sukkortut peqatigiiffianni siulittaasoq Allan Flyvbjerg.

- Siusinnerusukkut isumaqartoqartarpoq sukkornermik type 2-mik nappaateqaraanni timikkut kingornussisarnermi aqutsisut assigiinngitsorpassuit sunnerneqartartut. Siusinnerusukkut Islandimiut paasisaat naapertorlugit maannalu tuluit paasisaat naapertorlugit timikkut kingornussisarnermi aqutsisut ikittuinnaat ajoquteqarsinnaanerat paasineqarpoq. Taamaalilluta timikkut kingornussisarnermi aqutsisuni ajoqutit taakkua siunissami katsorsarniarsinnaalissavavut, Allan Flyvbjerg oqarpoq.

Sukkornermik type 2-mik nappaateqarneq, aamma angutip utoqqaap sukkornermik nappaataanik taaneqartartoq, kalaallinit amerligaluttuinnartunit ukiuni kingullerni nappaatigineqartalerpoq. Kalaallit 100-juugaangata aqqaneq-marluk sukkornermik nappaateqartarput. Dronning Ingridip napparsimmavissuani nappaammik pinaveersaartitsinissaq suliniutigineqaleruttorpoq. Ilaatigut Nuummi sukkortunut nakorsiartarfimmik pilersitsisoqassaaq. Sukkortunut atuarfinnik aamma aaqqissuisoqarniarpoq. Ullumikkut type 1-imik sukkortut atuartinneqarput.