Taakkunannga arlaqartut 2.000 koruunit angullugit pillaammik akiligassinneqarput.
Biilip sukkatsittaataa tukerluaraanni tamannguallu ingerlarsorluni, tamanna kukkuneruvoq, pingaartumik ulluni makkunani politiit illoqarfiit pingaarnersaanni laseri atorlugu sukkassutsimik nakkutilliineranni.
Ippassaannarmut biilertut 32-t sukkavallaartumik ingerlasut pakasaanikkut unitsinneqarput, taama erseqqissaavoq politikommissær Niels Nyvang.
- Biilit tamangajammik uuttortaanitsinnik saneqqussisut nal. akunneranut kilometerinik 40-nik 60-inillu sukkassuseqarluni ingerlanissaq qaangerlugu sukkassuseqartarput, Nyvang oqarpoq.
Sukkalisaarpallaarlunilu ingerlaneq akisuvoq, akisulluinnarsinnaallunilu, Niels Nyvang oqarpoq. Ullumi pillaammik akiligassiissutit amerlanerpaat 2.000 kr.-iupput, ataatsip aamma biilinik ingerlatsisinnaanerminut allagartaq nassanngilaa, taamalu 2.500 kr.-inik akiligassinneqarluni.
Politiit piffissami aggersumi sukkassutsimik misissuinertik nangeqqissavaat, tamatumali qaqugu pinissaa politikommissærip oqaatigiumanngilaa.
- Sapaatit akunnerini aggersuni akuttunngitsunik misissuisassaagut, ullullu tamaasa taamaaliortarnissarput inuit ilimagisassanngilaat, erniinnarluinnaq inissatsinneereertassagatta, Niels Nyvang oqarpoq.
Nuummi politiit neriupput siunissami ungasinnerusumi sukkavallaamik biilertartut sukkalisaarpallaartarunnaassasut.
- Neriuutigaarput aqqusinerni isumannaatsuunissaq pitsaanerulerumaartoq, biilertullu sukkassusissamut killiliussanik maleruaalerumaarlutik ajutoortullu ikinnerulerumaartut, politikommissær Niels Nyvang naggasiivoq. Ukiup ingerlanerani sinerissami sumiiffinni arlalinni laseri atorlugu sukkassusermik nakkutilliisoqartarumaarpoq.