- Tuniluunnersuup iluaniitilluta oqaloqatigisinnaannginnatsigit quarsaarnaqaaq, Anna Wangenheim (D) oqarpoq.Assiliisoq: KNR. Assi: KNR

Sukkasuumik misissuutinut kukkuluttorneq: Naalakkersuisut oqaaseqanngilluinnarnerat illuatungiliuttut quarsaarutigaat

Naalakkersuisut suli akissuteqarfiginngilaat sooq oqarsimanerlutik kommunit sukkasuumik misissuutinik tunniussuissasut, tamanna inatsisinik unioqqutitsineruppat.

- Neriuppunga naqqiuteqassasut sukkasuumik misisssuutit kikkunnut agguaanneqarnissaat pillugu, aamma soorunami inatsininik unioqqutitsisunik imaluunniit ilumuunngitsunik oqarsimanerminnut utoqqatsissasut.

Sapaatip akunnera kingulleq KNR-imut Anna Wangenheim Demokraatineersoq taama oqarpoq, saqqummermat kommunit sukkasuumik misissuutinik akeqanngitsunik innuttaasunut aningaasaqarnikkut unammilligassaqartunut agguaanissamik suliassaq tigusinnaanngikkaat. Kommunit taamaaliornianngillat, inatsisitigut periarfissaqannginnamik. 

AAMMA ATUARUK Illuatungiliuttut sukkasuumik misissuutit pillugit kukkuluttorneq pillugu: Naalakkersuisut utoqqatsertariaqarput 

Tamatuma Anna Wangenheim Naalaakkersuisunut utoqqatsissummik ujartuisippaa. Utoqqatsissut suli utaqqivaa. 

Illuatungiliuttut: Naalakkersuisut apeqqutit isorniartut akisariaqarpaat 

Sapaatip akunnerani kingullermi illuatungiliuttut ismaginninnermut aamma sulisoqarnermut naalakkersuisumit Mimi Karlsenimit qisuaateqarnissaq amigaatigaat.  

Nipaannerup illuatungiliuttut isornartorsiuinerat unitsinngilaa – akerlianilli:

- Tukattorujussuusutut ippoq. Isumaqarpunga tuniluunnersuup iluaniitilluta oqaloqatigisinnannginnassigit quarsaarnaqisoq. Taakkumi akisussaaffigaat innuttaasunut isumannaatsumik toqqissisimasumillu attaveqaqatigiinnissamut siuttuussallutik, Anna Wangenheim oqarpoq, sulilu isumaqarluni Naalakkersuisut kukkuluttornerminnut kommuninut utoqqatsissasut.

Erik Jensenimut Siumumi siulitaasumit taperserneqarpoq:

- Naalakersuisut tusagassiortunit allanillu isorniartunik aperineqaraangata  aammaarlugu ersersinneqaannartarpoq Naalakkersuisut sangujoraarlutik ingerlasut aalajangiisarlutillu nammineq paasinngisaminnik tunngavilersuillutik, Erik Jensen oqarpoq erseqissalunilu:

- Partiit naalakkersuisooqatigiit amerlanerussuteqaramik, amerlanerussutillit taakku Naalakkersuisut tapersersussavaat, aamma inatsisinik unioqqutitsigaluarpata, kukkusumillu paasissutissiisoqaraluarpat. Tamanna pakatsinaqaaq. Den seneste uge har oppositionen savnet en reaktion fra naalakkersuisoq for sociale anliggender og arbejdsmarked Mimi Karlsen.

Naalakkersuisunit nipaanneq 

Peqqissutsimut Naalakkersuisoq, Kirsten Fencker (Naleraq) uippakajaarluni sulinngiffeqarpoq. Naalakkersuisut marluk Mimi Karlsen (IA) aamma Pele Broberg (Naleraq) tassunga taartaapput. 

KNR-ip  Pele Broberg apersorniarsimagaluarpaa sukkasuumik misissuutit innuttaasunut aningaasaqarnikkut unammilligassartunut akeqanngitsut pillugit. Tamanna ajornarsimavoq.  Taarsiullugu Mimi Karlsenimut attaveqarnissatsinnut innersuunneqarpugut,  taanna aamma isumaginninnermut naalakkersuisuuvoq. Marlunngormat  nalunaarfigitippugut suliaq pillugu Mimi Karlsen apersorneqarnianngitsoq.

Sapaatip akunnera kingulleq tallimanngornikkut ualikkut Naalakkersuisut tusagassiuutinut nalunaarummi allapput maluginiarsimallugu:

"... kommunit nalunaarutigivaat misissuutinik pisinissamut akissaqannginnerusunut agguaasseqataarusunnatik. Taamaattumik Naalakkersuisut allatut iliuuseqarniarlutik periarfissanik ujartuipput. Anguniagarli tassaavoq innuttaasut tamarmik nammineq misissorsinnaanissaat, akissakilliornerlu aniffiussanngitsoq."

Kisianni ataasinngorneq ulloq 17. januaari tusagassiortunik katersortitsinermi isumaginninnermut sulisoqarnermullu Naalakkersuisoq, Mimi Karlsen, sukkasuumik misissuutit atorneqarnerat pillugu ima oqarpoq:

- Nakorsaaneq oqarpoq antigentestimik imaluunniit PCR-testimik misissortinnissaq pingaaruteqarunnaartoq. Massakkorpiaq imaappoq covid-19-imut ersiuteqaraanni imaluunnit napparsimasutut misigigaani misissortinnissaq pisariaqarunnaartoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl