Sukkanniuuteqataasoq snescooterinik angerlamut apuutissaaq
Jonas Kristensen maanna Nuussuarmiittoq radioaviisimut ilisimatitsivoq snescooterinik aaneqarnissaminut akuersisimalluni. Taamaalilluni qimmini 16-it snescooterit kalittagaanut assartuutinut ilaatillugit Nuussuarmiit Kullorsuarmut 50 kilometerit kingulliit ingerlaarfigisussanngorpai.
Jonas Kristensenip nammineq qimusserluni Nuussuarmiit Kullorsuarmut ingerlaassaguni qimmini qasuerserteqqaartariaqassallugit aluilu sikkorluttumi ingerlaarnerminni kilertitersimasut mamisaqqaartussaassangaluarlugit ilanngullugu oqaluttuarpoq.
Kisianni tassa aalajangersimavoq angerlamut apuukkusulluni, taamaalillunilu qimmini assartuutinut kalitsillugit unnummut apuuteqatigisussanngorpai.
Jonas Kristensenip Avannaata Qimussersuani peqataareerami unammiaqatigisimasani alla Upernavimmiit Nuussuarmut 150 kilometerit missaat ingerlaarfigalugu qimusseqatigivaa. Taakkua sikup ajornera pissutigalug Nutaarmiuni ullualunni aamma sapernullatsiarput.
Upernaviup nunaqarfiisa avannarlersaanit sukkanniuukkiat nunaqarfitik marsip 14-anili qimappaat.