Sukkanerusumik sullissilernissaq anguniarniarpaat
Kommunit isumaqarput qitiusumik akiliisitsiniartarneq isumaasoq pitsaanngitsoq.
Qitiusumik ingerlatsilernikkut pitsaanerusumik naammassineqartarnissaa aatsaat takussutissaqarpat tamanna ikaarsaarfiusariaqartoq KANUKOKA isumaqarpoq.
Inatsisartut 2005-imi aalajangerput januaarip aallaqqaataa 2007 aallarnerfigalugu akileraartarnermut tunngasut qitiusumit ingerlanneqalissasut, tassungalu atatillugu akiliisitsiniartarnermut tunngasut qitiusumit ingerlanneqalernissaat januaarip aallaqqaataaniit 2008-mit aallarnisarneqassasoq. Taamaaliornikkut anguniarneqarpoq sukkanerusumik ajornannginnerusumillu sullissilernissaq, qanorpiarli qitiusumik ingerlatsilernissap aaqqissuunnissaa naalakkersuisunit saqqumiunneqanngilaq.
Naalakkersuisut erseqqissumik nassuiaateqanngippata, kommunit neqeroorutigerusuppaat qitiusumik akiliisitsiniartarneq kommuniniiginnassasoq.
- Suliassaq kommuniniittariaqarpoq, innuttaasummi qanimut suleqatigisussaavagut, KANUKOKA-p siulittaasua, Lars Karl Jensen, naalakkersuisunut ilaasortamut, Josef Motzfeldtimut, allappoq.
Danmarkimi misilittagaalersut takutippaat akiliisitsiniartarnerup qitiusumik ingerlanneqalerneranit pisortanut akiligassat 10 procentimik amerleriarsimasut, tamannalu pisinnaasimavoq nutaamik aaqqissuussinerup siunertarigaluaraa qitiusumik aqutsilernerup pisortanut akiligassat ikilisissagai. Ajoraluartumilli paasinarsisimavoq kommunit namminneq pisassarisaannik tigusiniartarneq kommunit akiliisitsiniartarallarnerannisulli angusarissaarfiutigiunnaarsimasoq.
