Justus Hansen: Sukaterisoqartariaqarpoq !

Sukaterisoqartariaqarpoq innuttaasullu nammineerlutik allannguinissamut kajumissuseqalertariaqarput, taama isumaqarpoq kommunalbestyrelsemi politikereq Justus Hansen Tasiilami isumaginninnikkut pisut pillugit.
maajip 10-at 2019 06:20

Tasiilami pissutsit pitsaanerulernissaanut kommunalbestyrelse suliaqarpoq. Taama tusagassiuutinut allagagarput, DR-ip piviusulersaarusiaata “ Byen hvor børn forsvinder”  illoqarfimmi isumaginninnikkut ajornartorsiutit aallakaatinneqarnerani sammineqarnerisa kingorna.  

Kisianni tassa aamma nassuerutigineqarpoq, suliniutigineqartut pitsaanerusariaqartut, 

-  Pissutsit piviusut eqqorneqarput ukiorpassuarni atuussimasut, Justus Hansen DR-ip piviusulersaarusiaa pillugu taama oqarpoq, piviusulersaarutip takutinneqarnerata kingorna sakkortuunik aammali nersualaarinnittunik  oqaaseqarfigineqarpoq.

Justus Hansen Demokraatit sinnerlugit kommunalbestyrelsemi ilaasortaavoq, namminerlu Tasiilaminngaanneersuulluni.  

AAMMA ATUARUK Avataanit ikiorneqarnissaq pisariaqanngilaq

Hansenip nassuerutigaa, meeqqat inuussuttullu pillugit isumaginninnikkut suliassat nalunaarutigineqarsimasullu, suliarineqarsimanngitsut amerlasuut  pimoorunneqarsimannginnerat, Ilinniartitsisuusimasup Rikke Blegvadip  piviusulersaarummi  oqaluttuarisai.

-  Paasisinnaanngilluinnarpara.  Isumaginnittoqarfimmi sulisussaqannginneq utoqqatsissutigineqarpoq,  sukaterisoqartariaqarpoq !  Justus Hansen oqarpoq.

AAMMA ATUARUK Ilaqutariinnermut ataatsimiititaliap kommuni utaqqimaaqqaarniarpaa

Tasiilamut meeqqanut sullissinermut aningaasartuutit ukiut kingullit tallimat marloriaatit sinnerlugit amerleriarput. 

Taakkua ilaatigut atorneqarput inuusuttut ornittagaannik illumik nutaamik sanaartornermut , katsorsaavimmik katsorsaasumillu kiisalu inuusuttunut naartusunut siunnersortimik atorfinitsitsinermut atorneqarlutik.

Tasiilami tarnip pissusiinik ilisimasalimmik sulisoqarpoq aamma kommune  Namminersornerullutik Oqartussaniit  inunnik isumaginninnermi siunnersortimik ukiumi ataatsimi sulisussamik isumaqatigissuteqarput.

Taamaakkaluartoq ajornartorsiutit annertuallaartut, Justus Hansenip nassuerutigaa.

- Suliassagut soorunalimi  sumiginnarsimavagut tamakkiisumik eqqumaffigineqarsimanngimmata.

Tamanna akisussaaffigaarput. Ajunnginnerujussuarmik iliorsinnaavugut. Kisianni Tasiilami nunaqarfiinilu innuttaasut akisussaaffinnik aamma tigusinnissaat pisariaqartipparput, Justus Hansen oqarpoq.

Ammasumik oqaluuserinninneq
Justus Hansenip maluginiarpaa innuttaasut amerlanerusut pisut oqaluuserineqarnissaannut sapiinnerulersimasut innuttaasuullu ilungersuussilluartut arlaqartut illoqarfimmi iliuuseqalersut.  Taamaattumik DR-ip piviusulersaarusiaani ilaqutariit nukittut ilaatinneqanngimmata maqaasivai.

 Taakkoqqissaajuppummi kommune suleqatigalugu suliassamik kivitseqataasussat, Justus Hansen isumaqarpoq.  

 

AAMMA ATUARUK Kinguaassiuutitigut pinerluttuliornerit paqumigisaajunnaarsillik