Sukannernerusumik aqutsisoqarnissaa innersuussutigaat
Nunatsinni aningaasarsiorneq pillugu ministeriunermut siunnersuisartut nalunaarusiartik Katuami ullumi saqqummuippaat, Kalaallillu Nunaanni aninagasarsiorneq pitsaanerulissappat sipaarniartoqarnissaa imaluunniit sukannernerusumik aqutsisoqalernissaa innersuussutigineqarpoq. Siunnersuisartut siulittaasuat Christen Sørensen taama oqarpoq, nangipporlu:
- Aningaasat Kalaallit Nunaanni kaaviaartinneqartut amerlanersaat pisortaninngaanneersuupput, soorlu sanaartornermut atorneqartut, kiisalu ingerlatsinermut aningaasartuutit, taakkuuppullu Kalaallit Nunaanni aningaasarsiornermik napatitsisut, Christen Sørensen nassuiaavoq.
Assersuutitut Nuummi sanaartornerujussuaq taavaa, illoqarfiillu assigiinngitsut nutaanik immikkoortortaqalertiternerat.
Erngup nukinganik atuineq, aqqusinniorneq, ilaalu ilanngullugit ukiuni kingullerni amerliartuinnavissimanerat taakkartorneqarput, aningaasallu kaaviaartitat namminersortunut naleqqiullugu amerlanerujussuat tikkuarneqarluni.
Aningaasaqarniarnikkut sukannernerusumik ingerlatsisoqassappat isumaqarpoq pisortat aningaasartuutaat annikillisarneqartut akileraarutitigulluunniit isertitat amerlineqartut.
Aningaasanut inatsisissatut siunnersuut Aningaasaqarnermut naalakkersuisumit Aleqa Hammondimit aqagu saqqummiunneqassaaq.
