Suka K. Frederiksen Bruxellesimut ataatsimiigiartoq
Oqalliffiup tamatuma siunertaraa illuatungeriit ataavartumik oqaloqatigiittarnerisa pilersinnissaat, taamatullu OLT-rmiut EU-mik suleqateqarnermi pisinnaatitaaffii periarfissaallu nukittorsarnissaat.
Suka K. Frederiksen ataatsimiinnissat sioqqullugit EU-mi suliaqarfinnit NATO-miillu aallartitanik suliaqarfinnut attuumassutilinnik aamma ataatsimeeqateqarpoq.
Naalakkersuisup Danmarkip NATO-mi aallartitaa Michael Zilmer-Johns aammalu nunat avannarliit Norgep, Finlandip Islandillu NATO-mi aallartitaat ataatsimeeqatigai. Ataatsimiinnerit siunertaraat Nunatsinni, Issittumi NATO-mullu tunngatillugu maanna pisut NATO-llu juulimi ataatsimeersuartitsinissaata pillugit ilisimatitseqatigiinnissaq.
Taakku saniatigut naalakkersuisup EU-p nunanut allanut suliaqarnermi Vice-Generalsekretæria Christian Leffler, EU-p Issittoq pillugu politikkimi atorfilittat suliaqarnerinut akisussaanerpaasoq ataatsimeeqatigaa.
Nunatta EU-llu Issittoq pillugu soqutigisaat
Ataatsimiinnermi Nunatta EU-llu Issittoq pillugu soqutigisaat eqqartorneqarput, kiisalu EU-mi aningaasanut inatsisissap isumaqatigiinniutigineqarnerani, aasaq maanna aallartinneqartussami, Issittup pingaarnersiuiffigineqarnissaa oqaluuserineqarpoq.
Tamatumunnga atatillugu Suka K. Frederiksenip ilannguppaa Nunatta EU-mik suleqateqarnini pillugu sulinerup pitsaasup ingerlateqqinnissaa soqutigisarigaa – ajornanngippallu suleqatigiissutigineqartut amerlisarnissaat soqutigalugit.
Brexitimi killiffik ajornakusoortoq aamma eqqartorneqarpoq, tassanilu Nunatta aalisakkanik nioqqutissianik Tuluit Nunaannut pingaarutilimmik niueqateqarnera eqqartorneqarluni, Naalakkersuisut tusagassiorfinnut nalunaarummi taama allapput.