Suiaassuseq tunngavigalugu inuttalersuisarnissaq IA-p inatsisiliuuteqquvaa

Arnat siulersuisuni naammaginartumik ullutsinni peqataatinneqanngillat, Inuit Ataqatigiillu oqarnerat naapertorlugu imaanngilaq arnanik qinigassanngortittoqarpiarneq ajormat taamaattoqartoq.

- Pissusitoqqat ilisimasaqaqatigiillu arnat piginnaanillit soqutiginnittullu siulersuisunut ilaasortassatut mattussimammassuk taama pisoqarpoq. Ilumoorsorinngilarput arnanik piginnaanilinnik amigaateqartoqarmat, Naaja Nathanielsen oqarpoq.

Taassuma tikkuarpaa, suliffeqarfiit assigiinngisitaartunik katitikkanik pisortaqartitertut siulersuisoqartitertullu pitsaanerusumik ingerlasartut, taamaammallu siulersuisuni naligiissitaanerunissaq pillugu inatsisiliortoqarnissaanut eqqarsartoqarnissaanut tamanna tunngavissaasoraa.

- Kalaallit Nunaanni suiaassuseq tunngavigalugu, siulersuisuni siammasinnerusumik inuttalersuisalernissaq inatsisitigut aaqqittariaqarpoq, taamaaliornikkummi suliffeqarfiit nukittorsarneqassapput, alliartornissaminnut ineriartoqqissinnaanissaminnullu tunngavigissaarnerulissallutik. Inatsisartuni partiit allat isumaqatigissagaatik Naaja Nathanielsenip Inuit Ataqatigiinneersup neriuutigaa. Kalaallit Nunaammi nunanut allanut siumut isigalutik aalajangeereersimasunut aalajangiisartunullu ilannguttariaqartoq, Naaja Nathanielsen naggasiivoq.