Suiaaqatigiittut katissinnaaneq Savalimmiuni akuerineqartussanngorpasippoq

Danmarkimi suiaaqatigiit oqaluffimmi katissinnaanissaat danskit ilagiinnut ministeriata Maanu Sarenip aqqutissiuuppaa, tamannalu oqallinnermik annertuumik amerlaqisullu ilagiinnit ilaasortaajunnaarnerannik kinguneqarpoq. Nunani allani suiaaqatigiit assigiimmik pisinnaatitaaffeqartinnissaannik suliaqarneq taama siuarsimatiginngilaq.
maajip 08-at 2013 09:34

 

Suiaaqatigiit ilaatigut Savalimmiuni ukiorpassuarni ajattugaasarsimapput. Tamannali allanngortussatut maanna isikkoqarpoq. Gallupip inuit isumaannik misissuinera, Savalimmiuni LBGT-p suliaritissimasaa malillugu, savalimmiormiut pingasorarterutaasa suiaaqatigiit oqaluffikkuunngitsumik katitinneqarsinnaanissaat akueraat.

-Assigiimmik pisinnaatitaaffeqalernissatta sulissutiginerani tamanna annertuupilussuuvoq. Misissuineq taanna Savalimmiuni LGBT-mi savalimmiormiut akuersaarnerulersimanerannik maluginiagaqarsimanitsinnut uppernarsaavoq, LGBT Føroyarimi siulittaasoq Sonja Jógvansdóttir oqarpoq.

Savalimmiuni illuatungiliuttut aappariinnermut inatsisip allanngortinneqarnissaanut ukiaru siunnersuuteqarniarput. Siunnersuummi Ilagiinnik oqaluffiillu suiaaqatigiinnik katititsinissaannik pisussaaffiliissanngilaq, oqaluffikkoortuunngitsumilli katissinnaaneq kisiat pineqarluni.

-Neriuppunga Lagtingip misissuinerup inernera pimoorutissagaa aappariinnermullu inatsit allanngortillugu, suiaaqatigiit allat assingalugit katissinnaanngortillugit, Eiler Fagraklett LGBT Føroyarimeersoq oqarpoq.