Suiaaqatigiit katissinnaalernissaat nalorninartoqartoq

Suiaaqatigiit oqaluffimmi katissinnaanissaannik aalajangiiniarneq suli nalorninarallarpoq.

Suiaaqatigiit katittalersinnaanissaat pillugu inatsisissatut tunngaviusussat, soorlu ilaqutariinnerup iluani inatsisaasut eqqartuussiveqarnermullu inatsisit tamassumunnga tunngasut, qallunaat inatsisaannit avissaartillugit atorunnaarsinneqarnissaat, Inatsisartuni tamanit isumaqatigineqarluni siorna ukiakkut ataatsimiinnermi taasissutigineqaraluarpoq.

Inatsisip tamassuma qaqugu atuutilersinnaanissaa paaserusullugu, Inatsisartuni ilaasortap, Olga P. Berthelsenip paragraf 37 najoqqutaralugu Ilaqutariinnermut Naalakkersuisumut, Mimi Karslenimut apeqquteqaatigaa.

Nunatsinni inatsisissap Danmarkimi inatsimmut tulluussarneqarnera, Inatsisartunit siornali taasissutigineqarmat, oqartussaqarfinniit suliarineqaleraluarpoq, tamannalu pillugu paasiniaanerit arlallit pisimallutik.

Suliaq tamanna suli Folketingimiippoq, inatsisissatullu tunngaviusussat Nunatsinnullu naleqqussaanerit suli piareersimanatik. Taamaattumik Nunatsinni suiaaqatigiit oqaluffimmi  katissinnaalernissaminnut utaqqilaaqqaartariaqassapput imaluunniit pappilissatigut aappariittut isigineqalernissartik utaqqisariaqassavaat.