Sudanip kujasinnerusortaata namminiilivikkusunnera præsidentip akueraa

Sudanip kujataata namminiilivikkusunnera Sudanip præsidentiata Omar Bashirip akuerimmagu nunarsuarmi nunat ilapput. Bashir peqqussummik ullumi nassiussivoq, peqqussummi Sudanip kujataani inuit taasineranni inernerineqartut, tassalu namminiilivikkusunnerat, pisortatigoortumik akuerai.
Allattoq Mads Lynge
februaarip 07-at 2011 17:35

Peqqussut præsidentip oqaaseqartartuanit, Bakri Hassan Saleh-mit, naalagaaffiup tv-ani atuarneqarpoq. Taasinermi kisitsisit inernerineqartut kingusinnerusukkut saqqummiunneqarumaarput.

Innuttaasut januaarip qulingiluaaniit 15-ianut taasisinneqarsimapput. Taasisut Sudanip kujataaneersut, uuliaqarfimmeersut, 98,83 procentii Sudanip avannaanit avissaarusullutik taasisimapput. Taasinermi ataatsimiititaliarsuaq ullumi taama nalunaaruteqarpoq.

Innuttaasunik taasisitsineq Sudanip avannaata kujataatalu 2005-imi eqqisseqatigiinnissamut isumaqatigiissutaannit inerneruvoq.

Isumaqatigiinneq, taasineq avinnerlu Afrikami innuttaasut imminnut sorsunnerat sivisunerpaap taamaatinneranik inerniliivoq, nunamilu inuttaasut oqartussaaqataanerannik takutitsinerulluni.

Sudan Sudanillu kujataata qaammatit arfiniliinnaat atorlugit apeqqutit assigiinngitsut suliarisussanngorpaat, ilaatigut killeqarfiit sumiissanersut, uuliaqarfiullu Abyei-p qanoq ilinissaa, uuliamit isertitat nunap aningaasaasa naalagaaffiullu akiitsuisa avinnissai.

Sudanip kujataata juulip qulingiluaanni namminiilernisaa pilersaarutaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq