Sudan Kujallermi præsidentip, Salva Kiirip, pikitsitsisullu siulersortaata, Riek Macharip, isumaqatigiinnginnerisa kingunerisaanik Sudan Kujalleq namminersuleqqammiinnartoq inui 2013-ip naaneranili toqoraaffiusumik imminnut sorsuutilerput.Assi: Tony Karumba/AFP/Ritzau Scanpix

Sudan Kujallermi nutaamik isumaqatigiissuteqarnermi imminnut sorsuukkunnaalerpasittut

Sudan Kujallermi præsidenti pikitsitsisullu siulersortaat isumaqatigiipput, tamannalu Sudan Kujallermiut ukiuni arfinilinni imminnut sorsuunnerata naaneranik kinguneqarsinnaavoq.

Sudan Kujallermi præsidenti, Salva Kiir, pikitsitsisullu siulersortaat, Riek Machar, naalakkersuisooqatigiinnik pilersitsinissaminnut sisamanngornermi isumaqatigiipput.

Sudan Kujalliup inuisa imminnut ukiuni arfinilinni sorsuunnerata naaneranik malitseqarsinnaasumik naalakkersuisooqatigiinnik pilersitsineq utaqqimaarneqartuarsinnarnikuummat persuarsiutigineqarpoq.

- Ullut marluk qaangiuppata februaarip ulluisa 22-anni naalakkersuisooqatigiinnik pilersitsinissatsinnut isumaqatigiippugut. Allanut tunngasunik eqqartueqatigiittuarsinnarpugut, upperaaralu isumaqatigiissutigisinnaallutigit, pikitsitsisut siulersortaat, Riek Machar, ataatsimeeqatigeeramik taama oqarpoq.

Naalakkersuisooqatigiinnik pingajussaanik pilersitsinissaminnut isumaqatigiissimanertik, Salva Kiirip kingorna uppernarsarpaa. Isumaqatigiissutaat siulii marluk kingunipilupput.

AAMMA ATUARUK Inuit 65,6 millionit nunarsuaq tamakkerlugu qimaasuusut

Angutit taakkua isumaqatigiinnginnerisa kingunerisaanik Sudan Kujalleq namminersuleqqammiinnartoq inui 2013-ip naaneranili toqoraaffiusumik imminnut sorsuutilerput. Tamanna Sudan Kujalliup ilungersorluni namminersulereerneranit ukiut marluk marluk kingorna pivoq.

- Præsidentitut tullersortissakka aqagu toqqassavakka. Aallaqqaatigalugulu Riek Machari præsidentitut tullersortissatut aqagu toqqassavara. Massakkut naalakkersuisut aqagu atorunnaarsissavakka naalakkersuisunillu nutaanik februaarip ulluisa aappaanni pilersitsissallunga.

- Allannguinerit eqqisseqatigiinnermik kinguneqassapput, præsident, Salva Kiir, oqarpoq.

Illuatungeriit taakkua sivisuumik isumaqatigiinniarsaripput. Akerleriissagaluarpatalu imminnut sorsuuteqqilerataannaanissaat nunanit tamalaanit annilaangatigineqarluni.

Naalakkersuisooqatigiinnillu pilersitsinissaminnut isumaqatigiinnertik decembarimi nalunaarutigaat. Aalajangiisuusussalli aatsaat sisamanngornermi isumaqatigiissutigisimarpasippaat.

Illuatungeriit taakkua ukiuni marlunni imminnut sorsuutereerlutik eqqisseqatigiinnissamut 2015-imi isumaqatigiissuteqarput, Riek Macharilli pikitsitsisut siulersortaaffigisai naalagaaffiup sakkutuuinit illoqarfiit pingaarnersaannit anisitaareernerisa kingorna isumaqatigiissutaat ajalusoorpoq.

Inuit 10.000-likkaat toqoraaffiusumik akerleriinneranni toqutaapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat