Submarinomik filmiliortoq akissarsitinneqarpoq
Qallunaap filminik ilitsersuisartup Thomas Vinterbergip filmiliaa "Submarino" Nunat Avannarliit Siunnersuisoqatigiivisa filminut akissarsissutigitittagaannik akissarsitinneqarpoq.
Allattoq Apollo Jeremiassen
oktobarip 20-at 2010 06:06
Thomas Vinterbergip filmiliaa siulleq "Festen", Cannesimi 1998-imi naliliisartut immikkut akissarsissutigitittagaannik pissarsivoq, tassalu aatsaat maanna Thomas Vinterberg akissarsitinneqaqqippoq.
"Submarino"-p filmiliarinerani Thomas Vinterberg eqquilluaqqippoq.
- "Submarino" eqqumiitsuliaavoq imartooq, manuskriptigissuulluni ilitsersugaalluarlunilu, akissarsitinneqarnissaanut tunngavilersuutini naliliisartut taama allapput.
Filmip oqaluttuaraa, Københavnimi inuuneq artornartoq, ikiaroornartumik atuineq aamma avatangiisini erloqinartuni meeqqat peroriartornerat.
Akissarsitinneqarnerup aningaasartaat 350.000 koruuniupput, taakkulu ilitsersuisumit, filmiliornermi akisussaasumit aamma manusskriptiliortuanit avinneqassallutik.
