Assi: Tilioq

Suaarut: Inuppassuit pisariaqartitaqartut nuuttartut

Innarluutilinnut suliniaqatigiiffik innarluutillit kommunimi ingerlatsinermi unammillernartitaannik najukkami qinikkanut ilisimasaqartitsilernissaq pillugu qaammarsaaleruttorpoq.

Kommunini qinikkat kommunip aningaasaataanik agguaaleraangamik inunnut innarluutilinnut isumaginninnissartik puigortarpaat.

Nunarput tamakkerlugu suliniaqatigiiffik Nunatsinni Inuit Innarluutillit Kattuffiat (NIIK) taama isumaqarpoq. 

- Inuttut allatuulli innarluutillit inuuneqarnissaannut ikorfartorneqarnissaat, innarluutillit pillugit isumaqatigiissummi Kalaallit Nunaannilu inatsisit malillugit siunertaavoq. Ikorfartorneqarsimanngikkaannilu inuunermi atugassarititaasuni qanoq inissisimasoqarnersoq ersertarpoq, NIIK-imi siulittaasoq Anders Meilvang oqarpoq.

AAMMA ATUARUK Ikiorneqarluarumalluta Danmarkimut nuuppugut

Kommunalbestyrelsimut apriilip ulluisa arfernanni qinersinissamut NIIK anguniagaqarpoq: Tassalu innarluutillit pillugit taakkulu kommunimi ingerlatsinikkut unammillernartitaanik qinikkat paasitinneqarnissaat. 

Naligiinginnerujussuaq 

Atuarfeqarnermut, suliffeqarnermut, ineqarnermut, sunngiffimmi soqutigisanut peqqinnissamullu tunngatillugu naligiinngittoqarneranik paasititsiniutaasoq 'Give me 5' aqqutigalugu ilisimasaqarnerulernissaq suliniaqatigiiffiup kissaatigaa. 

- Atuarfeqarfiit meeqqap immikkut pisariaqartitsisup ikorfartornissaanut piareersimanngillat, meeqqallu amerlasuut atuarfimmiit soraarummeerneq ajorput. Atuarunnaaraannilu suliffittaarnissaq iluassaaq. Innarluutiliparujussuillu siusinaarluni soraarnermusiaqalersarput, inuunermilu sinnera ikiorsiissutisiaqartinneqalerlutik, inuiaqatigiinnut iluaqutaanatik pitsaasumillu inuuneqassanatik, Anders Meilvang nassuiaavoq.

AAMMA ATUARUK Inuit tarnimikkut innarluutillit pigiliutiinnakkanik isumaqarfigineqartarput

Aammattaaq inissianik aserfallassimasunik innarluutilinnullu tulluanngitsunik innarluutillit neqeroorfigitittartut, NIIK isumaqarpoq.

Innarluutilipparujussuarnut sunngiffimmi susassaqarfiusinnaaneq ajorpoq, timersortarfinnummi katersortarfiusunullu isersinnaanissaq ajornakusoorsinnaasarmat.

Isersinnaasimagaannilu issiavimmi kaasuartakkamiissimagaanni init angalaarfigiuminaattarput, imaluunniit innarluutilinnit peqataaffigineqarsinnaasunik sammisassaqarneq ajorpoq.

Minnerunngitsumillu timikkut eqqarsartaatikkullu inuppassuit pisariaqartitaminnik neqeroorfigitinneq ajornerat NIIK-imiit uparuarneqarpoq. 

Iliuusissaaleqinerujussuaq

Innarluutillit pisinnaatitaaffiinut Kalaallit Nunaata qulakkerinnissinnaannginnera Naalagaaffiit Peqatigiinninngaanniit siornatigut isornartorsiorneqarnikuuvoq. Ajornartorsiullu qinikkaninngaaniit ilisimaneqartoq Anders Meilvangip misigaa. 

- Sumiluunniit paasineqartaqaagut ajuusaartoqartaqalunilu. Amerlanertigulli iliuussissaarutivittoqartarluni. Soorlu iliuuseqavittoqanngisaannassasoq. Taamaasillutalu pitsaanerusumik iliuuserineqarsinnaasunik siunnersuutinik tigussaasunik saqqummiussilluta misilipparput.

AAMMA ATUARUK Innarluutillit illersuisuat: Taamaammat soraarniuteqarpunga

Qinikkat qanoq iliorsinnaappat? 

- Iliuusissat tigussaasut amerlaqaat. Kommunimullu qinigaagunik innarluutillit atugaannut soqutiginninnerulernissaat taakkununngalu aaqqiissuteqarnissamut piumasaqarnissaat aallarniutaalluarsinnaavoq. Iliuuseqarfigiuminartut arlaqarput, tamakkiisumilli aaaqiiniarnissaq sulinassaaq.

Ikiortinniarluni allamut nuuttariaqartoq

Tunngavigineqartoq ajungaarmat qanoq iliortoqaraluarpalluunniit aaqqiissuteqarnerussasoq, Anders Meilvang oqarpoq. 

- Innarluuteqaraanni innarluutilimmilluunniit qitornaqalersimagaanni nunamut allamut nuuttariaqalernermik aalajangiisoqaraangat nikallunganartittaqaarput. Ingammik Danmarkimut, tassanimi ikorfartuutaasinnaasut pisariaqartinneqartut ipput, siulersuisut siulittaasuat oqarpoq nangillunilu: 

-  Illoqarfeeqqaniit Nuummut aamma nuuttoqartarpoq, pissutsit taamaakkaluartut Nuummi ikorfartorneqarnerusoqarsinnaammat sinerissamut sanilliullugu. Tassami inuppassuit angerlarsimaffitsik ilaatigullu nunagisartik qimattariaqalersarpaat Kalaallit Nunaanni pisariaqartitaraluaminnik ikiorneqassagunik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat